Bakıda ərini öldürürərək həyətdə basdırmaqda təqsirləndirilən qadına hökm oxunub

Bakının Sabunçu rayonunda ərini qətlə yetirərək yaşadığı həyətdə basdırmaqda təqsirləndirilən Elmira İbrahimovanin cinayət işi üzrə məhkəməsi yekunlaşıb.

Bakı Ağır Cinayətlər Məhkəməsinin hakimi Səbinə Məmmədzadənin sədrliyi ilə keçirilən sonuncu iclasda Elmira İbrahimova son söz zamanı həyat yoldaşını qəsdən yox, təsadüfən öldürdüyünü vurğulayaraq məhkəmədən onun barəsində ədalətli hökm çıxarılmasını xahiş edib.

Müşavirədən sonra hökm oxunaraq Elmira İbrahimova 12 il azadlıqdan məhrum edilib.

Xatırladaq ki, ötən prosesdə prokuror təqsirləndirilənin 12 il 6 ay azadlıqdan məhrum olunmasını məhkəməyə təklif etmişdi.

Qeyd edək ki, hadisə Sabunçu rayonunun Bakıxanov qəsəbəsində baş verib. Qəsəbədə yaşayan 1985-ci il təvəllüdlü Samir Arif oğlu Əliyevin itkin düşməsi ilə bağlı 2024-cü il dekabrın 24-də ailə üzvləri tərəfindən polisə müraciət edilib.

Polis və prokurorluq əməkdaşlarının birgə keçirdikləri əməliyyat-istintaq tədbirləri nəticəsində bir ildən sonra S.Əliyevin 1986-cı il təvəllüdlü həyat yoldaşı Elmira Vidadi qızı İbrahimova tərəfindən ov silahı ilə qətlə yetirildiyi və meyitin yaşadığı evin həyətində basdırıldığı müəyyən edilib.

Cinayət əməlini törətməkdə şübhəli bilinən E.İbrahimova tutularaq istintaqa təhvil verilib.

Faktla bağlı cinayət məcəlləsinin müvafiq maddələri ilə cinayət işi açılaraq ittiham irəli sürülüb.

Təqsirləndirilənin məhkəmədəki ifadələrindən məlum olub ki, o, həyat yoldaşını ona işgəncələr verdiyinə görə həyatdan məhrum edib. Bundan sonra o, meyiti həyətdə qazdığı quyuda basdıraraq 11 ay gizlədib.