Azərbaycanda işçilərin işlədiyi orta aylıq saatların artması əmək bazarında diqqət çəkən göstəricilərdən biridir. 2026-cı ilin yanvar-iyun aylarında bir işçiyə düşən orta aylıq işlənmiş iş saatı 144 saat təşkil edib. Bu, ötən ilin eyni dövrü ilə müqayisədə 3,1 saat və ya 2,2 faiz çoxdur. 2025-ci ilin ilk yarısında isə bu göstərici 140,9 saat olub.

Bu barədə Median.Az-a açıqlamasında iqtisadçı Xalid Kərimli deyib ki, orta aylıq əmək haqqı 7 faiz artıb:

“Bunun hansı hissəsinin işçi saatlarının artması hesabına, hansı hissəsinin isə işçi saatlarının dəyişmədiyi halda əmək  haqqının yüksəlməsi hesabına formalaşdığını müəyyənləşdirmək üçün dərin təhlil aparılmalıdır. Bunun üçün müvafiq məlumatlar və statistik göstəricilər lazımdır. Belə məlumatların əldə edilməsi üçün Məşğulluq Agentliyinə, Əmək və Əhalinin Sosial Müdafiəsi Nazirliyinə və Milli Observatoriyaya müraciət etmək daha məqsədəuyğundur. Onların əsas fəaliyyət istiqamətlərindən biri də məhz bu cür məlumatların toplanması, müşahidəsi və təhlilidir. Hazırda bu göstəricilər əsasında əmək haqqındakı artımın səbəblərini dəqiq müəyyənləşdirmək mümkün deyil. Bunun üçün işçilərin əmək haqqı ilə yanaşı, işlədikləri saatların sayı və məşğulluq forması barədə məlumatlar da nəzərə alınmalıdır. Eyni zamanda, müxtəlif iqtisadi fəaliyyət sahələri üzrə əmək haqqı və iş vaxtı göstəricilərinin müqayisəsi aparılmalıdır. Bu məlumatların təhlili artımın əsasən hansı amillərlə bağlı olduğunu müəyyən etməyə imkan verə bilər. Belə araşdırma üçün rəsmi statistik məlumatların və aidiyyəti qurumların təqdim etdiyi göstəricilərin müqayisəsinə ehtiyac var”. 

Ayselскачать dle 11.3