Yay mövsümünün başa çatması və payız aylarının başlaması ilə əmək bazarında da müəyyən dəyişikliklər gözlənilir. Kənd təsərrüfatında məhsul yığımı, təhsil müəssisələrinin fəaliyyətə başlaması, ticarət və xidmət sahələrində fəallığın artması yeni işçi qüvvəsinə tələbat yarada bilər. Mövsümi iş yerləri xüsusilə qısamüddətli gəlir əldə etmək istəyən şəxslər üçün imkan yaradır. Bəs payız aylarında hansı sahələrdə işçi tələbatının artması gözlənilir?

İnsan resursları üzrə menecer Röyal Əhmədov Median.Az-a açıqlamasında bildirib ki, payız aylarının başlaması ilə əmək bazarında müəyyən canlanmanın müşahidə olunması təbii prosesdir:
“Yay mövsümündən fərqli olaraq payızda həm bəzi sahələrdə mövsümi işlərin həcmi artır, həm də şirkətlər ilin sonuna qədər qarşıya qoyulan planları reallaşdırmaq üçün əlavə işçi qüvvəsinə ehtiyac duyurlar. Bu baxımdan payız ayları əmək bazarında xüsusilə müəyyən istiqamətlər üzrə yeni imkanların yarandığı dövr kimi qiymətləndirilə bilər. Kənd təsərrüfatı payız aylarında işçi tələbatının artdığı əsas sahələrdən biridir. Məhsul yığımı, çeşidlənməsi, qablaşdırılması, anbarlara yerləşdirilməsi və logistika proseslərində əlavə işçi qüvvəsinə ehtiyac yaranır. Bu sahədə xüsusilə qısamüddətli və mövsümi işlərə üstünlük verilir. Peşəkar təcrübəsi olmayan şəxslər üçün də müəyyən imkanların olması kənd təsərrüfatını mövsümi iş axtaranlar üçün əlçatan istiqamətlərdən birinə çevirir”.

O deyib ki, təhsil sektorunda da payız aylarında aktivlik nəzərəçarpacaq dərəcədə artır:
“Yeni tədris ilinin başlaması ilə məktəblər, hazırlıq kursları, tədris mərkəzləri və digər təhsil müəssisələrində müxtəlif vəzifələr üzrə ehtiyac yarana bilər. Burada yalnız müəllim və təlimçiləri deyil, administrator, koordinator, satış və müştəri xidmətləri üzrə əməkdaşları, texniki və yardımçı heyəti də nəzərə almaq lazımdır. Pərakəndə ticarət və xidmət sektorunda da payız aylarında müəyyən canlanma müşahidə olunur. İnsanların gündəlik aktivliyinin artması, tədris ilinin başlaması və ilin sonuna yaxın alış-veriş dövrünün yaxınlaşması mağazalarda, supermarketlərdə, restoranlarda, kafe və digər xidmət obyektlərində işçi ehtiyacını artıra bilər. Satıcı, kassir, satış məsləhətçisi, ofisiant, operator, anbar əməkdaşı və kuryer kimi vəzifələr mövsümi iş axtaranlar üçün daha əlçatan ola bilər. Logistika və anbar sektorunu da xüsusi qeyd etmək lazımdır. Ticarət dövriyyəsinin artması məhsulların daşınması, çeşidlənməsi və saxlanılması proseslərinə təsir göstərir. Nəticədə anbar işçiləri, yükləyicilər, kuryerlər, sürücülər, logistika üzrə köməkçi və əməliyyat əməkdaşlarına tələbat yarana bilər”.

Sonda o qeyd edib ki, bundan əlavə, payız aylarında ofis və inzibati vəzifələr üzrə vakansiyalarda da müəyyən artım müşahidə oluna bilər:
“Yay məzuniyyətləri dövrünün başa çatması ilə şirkətlər öz fəaliyyətlərini daha aktiv şəkildə davam etdirir, yeni layihələrə başlayır və ilin sonuna qədər olan iş planlarını həyata keçirməyə çalışırlar. Bu da satış, müştəri xidmətləri, insan resursları, mühasibatlıq, marketinq və digər istiqamətlərdə yeni vakansiyaların yaranmasına şərait yarada bilər. Mövsümi iş axtaran şəxslər isə seçim edərkən yalnız əməkhaqqına deyil, işin müddətinə, əmək müqaviləsinin olub-olmamasına, iş qrafikinə, ödəniş şərtlərinə və işin gələcəkdə daimi məşğulluğa çevrilmə imkanına diqqət yetirməlidirlər. Çünki mövsümi işlər bəzən yalnız qısamüddətli gəlir mənbəyi deyil, eyni zamanda şəxsin həmin sektorda təcrübə qazanması və sonradan daimi işə keçməsi üçün başlanğıc nöqtəsi ola bilər. Xüsusilə gənclər, tələbələr, yeni məzunlar və əlavə gəlir əldə etmək istəyən şəxslər üçün mövsümi vakansiyalar əmək bazarına daxil olmaq baxımından mühüm imkan yaradır. Təcrübəsi olmayan şəxslər belə satış, xidmət, logistika, anbar və müştəri xidmətləri kimi sahələrdə ilkin iş təcrübəsi əldə edə bilərlər. Ümumilikdə, payız əmək bazarında həm mövsümi, həm də daimi məşğulluq baxımından kifayət qədər hərəkətli dövr hesab oluna bilər. Kənd təsərrüfatı, təhsil, pərakəndə ticarət, xidmət, logistika, anbar və müştəri xidmətləri daha çox diqqət çəkən istiqamətlərdir. Bununla yanaşı, rəqəmsallaşmanın sürətlənməsi ilə texnologiya, rəqəmsal marketinq, onlayn satış və müxtəlif inzibati-peşəkar istiqamətlərdə də vakansiyaların artması mümkündür. Əmək bazarına daxil olmaq istəyən şəxslər üçün əsas tövsiyə isə mövsümi işləri yalnız müvəqqəti qazanc kimi deyil, həm də təcrübə və bacarıq toplamaq imkanı kimi qiymətləndirməkdir. Düzgün seçilmiş mövsümi iş gələcəkdə daha yaxşı və daha stabil məşğulluq imkanlarına keçid üçün əhəmiyyətli başlanğıc ola bilər”.

Ayselскачать dle 11.3