Qurban Qurbanov: "Yavaş-yavaş səbrim tükənir"

"İnanın ki, illər məni səbirdən çıxarıb".

Bu fikirləri "Qarabağ" klubunun baş məşqçisi Qurban Qurbanov "Dinamo" ilə oyundan əvvəl keçirilən mətbuat konfransında "Cəbrayıl "Dinamo" ilə ilk oyunda qırmızı vərəqə ilə cəzalandırıldı və ona sakit yanaşdınız, səbəbi nə idi?" sualına cavab olaraq bildirib.

Baş məşqçinin illər əvvəl Kevin Medina və Miçel Madeyra qırmızı vərəqə ilə meydandan qovulanda onlara çox sərt reaksiya verdiyi xatırladılıb:

"Yavaş-yavaş səbrim tükənir. Orada oyun epizodları var. Futbolçu üçün gözlənilməz qırmızı vərəqədir, rəqibi görmürsən, səni qabaqlayır. Bu cür epizodlarda penalti də olur. Həmin epizod fərqli idi. Medina Ağadadaş Salyanskiyə qarşı sərt oynamışdı. Ona görə əsəbiləşmişdim. Miçelə nə qədər əsəbiləşsəm də, ən çox sevdiyim oyunçulardan biri olub. Məşqlərdə də çox danışırdı, işini 100 faiz yerinə yetirirdi. Ona bildirmişdim ki, qarşıda vacib oyun var, vərəqəyə diqqətli yanaşmalıyıq. Miçelə ona görə əsəbiləşmişdim. Adam bəzən sadə epizodlara görə əsəbiləşir".

Xatırladaq ki, UEFA Konfrans Liqası çərçivəsində Tofiq Bəhramov adına Respublika stadionunda keçiriləcək "Qarabağ" - "Dinamo Kiyev" matçı sabah saat 20:00-da start götürəcək.

İlk oyun rəqibin 1:0 hesablı qələbəsi ilə başa çatmışdı.