HƏMAS tərk-silah olunması üçün şərtlərini açıqladı

İsrail tərəfindən hərbi əməliyyatlar və hücumlar dayandırılacağı təqdirdə HƏMAS tərk-silah prosesinə başlayacaq.

Fələstin hərəkatının nümayəndələri bunu "RİA Novosti"yə müsahibələrində səsləndiriblər.

"Hərbi toqquşmaların və İsrail hücumlarının başa çatması razılaşdırılmış qrafiklərin tərtib edilməsi, müqavilənin icra mexanizmlərinin müəyyənləşdirilməsi də daxil olmaqla icra mərhələsinə keçid üçün əsas şərtdir", - deyə təşkilatdan bildirilib.

Hərəkat təmsilçiləri xatırladıblar ki, Qəzza zolağında vəziyyətin nizamlanması planı əhatəlidir və bir neçə bəndin eyni vaxtda yerinə yetirilməsini nəzərdə tutur:

"Xüsusilə, hərbi əməliyyatların dayandırılması və İsrail qüvvələrinin anklavdan çıxarılması ilə yanaşı, bölgənin bərpası proqramlarına başlanılmalı və humanitar yardımın çatdırılması təmin edilməlidir".

Qeyd edək ki, bir müddət əvvəl ABŞ Prezidenti Donald Tramp tərəfindən yaradılan Sülh Şurası Qəzza zolağında münaqişənin sonlandırılması üçün ətraflı plan dərc edib. Sənəddə Fələstin qruplaşmalarının mərhələli şəkildə tərk-silah edilməsi, idarəetmənin Qəzzanın İdarəedilməsi üzrə Milli Komitəyə verilməsi və İsrail qoşunlarının bölgədən çıxarılması öz əksini tapıb.