Hakimlərin fəaliyyətinin qiymətləndirilməsi qaydaları və metodologiyası təsdiq olunub.

Bununla bağlı müvafiq qərar imzalanıb.

Hakimlərin fəaliyyətinin, o cümlədən məhkəmə sədrlərinin, sədr müavinlərinin və məhkəmə kollegiyaları sədrlərinin məhkəmə fəaliyyətinin təşkili ilə bağlı işin qiymətləndirilməsi aşağıdakı məqsədlərlə aparılır:

- ədalət mühakiməsinin keyfiyyətinin artırılması;

- məhkəmə sistemində idarəçiliyin təkmilləşdirilməsi;

- hakimlərin vəzifədə irəli çəkilməsində şəffaflığın təmin olunması;

- hakimlərin fəaliyyətinin stimullaşdırılması;

- hakimlərin tədris ehtiyaclarının müəyyənləşdirilməsi;

- hakimlərin hakimlik fəaliyyətini, inzibati vəzifə tutan hakimlərin isə inzibati səlahiyyətlərinin icrasını davam etdirməyə uyğunluğunun müəyyən edilməsi.

İlk dəfə 3 il müddətinə təyin edilmiş hakimlərin fəaliyyəti həmin müddətin sonunda, digər hakimlərin fəaliyyəti 5 ildə bir dəfədən az olmayaraq, məhkəmə sədrlərinin, sədr müavinlərinin və kollegiya sədrlərinin inzibati səlahiyyətlərin icrası üzrə fəaliyyəti isə bu vəzifələr üzrə səlahiyyət müddətinin sonunda qiymətləndiriləcək.

Hakimlərin fəaliyyəti aşağıdakı meyar qrupları üzrə qiymətləndirilir:

- peşə bilik və bacarıqları, onların ədalət mühakiməsinin həyata keçirilməsində tətbiq etmək qabiliyyəti;

- işgüzar bacarıqlar;

- kommunikasiya bacarıqları;

- etika və intizamlılıq.

Aşağıdakı hallarda yuxarı instansiya məhkəməsi tərəfindən məhkəmə aktının ləğvi və ya dəyişdirilməsi hakimin prosessual fəaliyyətinin mənfi qiymətləndirilməsi üçün əsas deyil:

- təkrar baxış zamanı aşağı instansiya məhkəməsinin aktının dəyişdirilmədən saxlanılması;

- kassasiya instansiya məhkəməsi tərəfindən birinci instansiya məhkəməsinin gəldiyi hüquqi əsaslandırma və nəticəyə uyğun qərarın qəbul edilməsi;

- ləğv edilmiş məhkəmə aktının çıxarılması zamanı hakimin xüsusi rəydə qalması və yuxarı instansiya məhkəməsinin qərarının həmin xüsusi rəyə uyğun olması, yaxud yuxarı instansiya məhkəməsinin tərkib üzvlərindən birinin aşağı instansiya məhkəməsinin hüquqi mövqeyi ilə üst-üstə düşən xüsusi rəy verməsi;

- məhkəmə aktının ləğvinə qanunvericiliyin və ya məhkəmə təcrübəsinin dəyişməsinin səbəb olması;

- məhkəmə aktının ləğvi yuxarı instansiyada iddianın etirafı, iddiadan imtina və barışıq sazişinin bağlanması səbəbindən olması;

- məhkəmə aktının ləğvi yuxarı instansiyada dövlət və ya xüsusi ittihamçı tərəfindən ittihamdan imtina edilməsi, zərərçəkmiş şəxslə barışma və dəymiş ziyanın ödənilməsi nəticəsində cinayət məsuliyyətindən azad etmə, habelə cəlbetmə müddətinin keçməsi səbəbindən olması;

- məhkəmə aktının ləğvi yuxarı instansiyada inzibati xətalara dair işlərdə cəlbetmə müddətinin keçməsi, inzibati xəta törətmiş şəxs tərəfindən cərimənin ödənilməsi və zərərçəkmiş şəxslə barışması səbəbindən olması;

- məhkəmə aktının ləğvi yuxarı instansiyada inzibati işlərdə mübahisənin olmaması səbəbindən olması;

- məhkəmə aktının ləğvi qüvvəyə minmiş məhkəmə aktına yeni açılmış hallar üzrə yenidən baxılması səbəbindən olması.скачать dle 11.3