Çörəyin dondurulması yalnız məhsulun daha uzun müddət saxlanmasına və qida tullantılarının azalmasına kömək etmir, bəzi hallarda onun qida xüsusiyyətlərini də yaxşılaşdıra bilər.

Qaynarinfo xəbər verir ki, bu barədə həkim Cina Şimanska "Wprost” nəşrinə danışıb.

Onun sözlərinə görə, dondurma prosesi çörəyin tərkibindəki qida maddələrini məhv etmir. Əksinə, çörək əridildikdən sonra, xüsusilə tosterdə qızdırıldıqda, nişastanın quruluşunda dəyişiklik baş verir.

Nəticədə "davamlı nişasta” adlanan maddə yaranır. Bu maddə məhsulun qlisemik indeksini azalda bilər və səhər yeməyindən sonra qanda şəkərin səviyyəsinin daha yavaş yüksəlməsinə kömək edir.

Bundan əlavə, davamlı nişasta bağırsaqdakı faydalı bakteriyalar üçün qida mənbəyi hesab olunur və mikrofloranın sağlamlığını dəstəkləyə bilər.

Mütəxəssis qeyd edib ki, bəzi hallarda dondurulmuş çörək təzə çörəklə müqayisədə daha uyğun seçim ola bilər.

Çörəyin keyfiyyətini qorumaq üçün yalnız təzə və tam soyudulmuş məhsulu dondurmaq tövsiyə olunur. Onu əvvəlcədən dilimləmək və porsiyalar şəklində saxlamaq daha əlverişlidir. Bu zaman ehtiyac olduqda yalnız lazım olan qədər çörək çıxarmaq mümkündür.

Saxlama zamanı çörəyin qurumasının və yad qoxuları özünə çəkməsinin qarşısını almaq üçün hermetik paketlərdən və ya qablardan istifadə etmək məsləhətdir.

Həkim həmçinin xəbərdarlıq edib ki, əridilmiş çörəyi yenidən dondurmaq olmaz. Bu, mikroorqanizmlərin çoxalması riskini artıra və qida təhlükəsizliyi problemlərinə səbəb ola bilər.скачать dle 11.3