Pakistanın cənub-qərb bölgəsində sərnişin avtobusunun dərəyə yuvarlanması nəticəsində azı 40 nəfər həlak olub, daha 8 nəfər isə müxtəlif dərəcəli bədən xəsarətləri alıb.

Bu barədə hüquq-mühafizə orqanlarına istinadən "Dawn" nəşri xəbər yayıb.

Yerli polisin məlumatına əsasən, bədbəxt hadisə Bəlucistan və Xayber-Paxtunxva əyalətlərinin sərhədi yaxınlığındakı Dxana Sar dağlıq ərazisində qeydə alınıb. Xəsarət alan şəxslər xəstəxanalara yerləşdiriliblər.

"Daily Pakistan" qəzetinin yazdığına görə, xilasetmə qrupları yaralıların təxliyəsi və onlara lazımi tibbi yardımın göstərilməsi istiqamətində əməliyyatları davam etdirir, lakin ərazinin çətin relyefi işləri yubadır.

"Dawn" nəşrinə polisdən verilən məlumata görə, içərisində 36 sərnişin olan avtobus Bəlucistan əyalətinin paytaxtı Kvetta şəhərindən Xayber-Paxtunxva əyalətinin inzibati mərkəzi sayılan Pəşavərə doğru hərəkət edirmiş. Yolüstü nəqliyyat vasitəsinə xarab olmuş digər avtobusun sərnişinləri də minib. İki əyalətin sərhədini keçdikdən dərhal sonra nəqliyyat vasitəsi dərəyə düşüb.
скачать dle 11.3