Tovuza sərnişin aparan şəxs gecələmək istədi, ÖLDÜRÜLDÜ - QƏTLİN TƏFƏRRÜATI (Yenilənib)

Tovuz rayonunda baş verən qətlin bəzi təfərrüatları məlum olub.

Oxu.az-ın məlumatına görə, hadisə iyunun 30-da gecə saatlarında rayonun Əyyublu kəndində baş verib. Qətlə yetirilən Bakı şəhər sakini, 32 yaşlı Elməddin Quliyev şəxsi mikroavtobusu ilə Əyyublu kəndinə sərnişin gətiribmiş. Sərnişinləri düşürəndən sonra, o, kənd ərazisində gecələmək qərarına gəlib. Həmin vaxt, o, 1997-ci il təvəllüdlü kənd sakini Asəf Rüstəmovla rastlaşıb və aralarında mübahisə yaranıb. Mübahisə nəticəsində A.Rüstəmov Elməddinə qarın və ürək nahiyələrindən bıçaq zərbələri endirib. Yaralı xəstəxanaya çatdırılsa da, onun həyatını xilas etmək mümkün olmayıb.

Məlumata görə, hadisəni törətməkdə şübhəli bilinən Asəf Rüstəmov Əyyublu kənd sakini olsa da, uzun müddət Rusiyada yaşayıb və bir neçə ay əvvəl Azərbaycana qayıdıbmış.

Polis əməkdaşlarının keçirdikləri tədbirlər nəticəsində hadisəni törətməkdə şübhəli bilinən Asəf Rüstəmov saxlanılaraq istintaqa təhvil verilib.

Faktla bağlı cinayət işi başlanılıb.

* * * * *

Tovuzda qətl hadisəsi baş verib.

Median.Az APA-ya istinadən xəbər verir ki, hadisə rayonun Əyyublu kəndində qeydə alınıb.

Tovuz Rayon Polis Şöbəsinə Bakı şəhər sakini, 32 yaşlı Elməddin Quliyevin kəsici-deşici alətlə xəsarət alması və yerləşdirildiyi xəstəxanada ölməsi barədə məlumat daxil olub.

Polis əməkdaşlarının keçirdikləri tədbirlər nəticəsində hadisəni törətməkdə şübhəli bilinən Tovuz rayon sakini, 29 yaşlı Asəf Rüstəmov saxlanılaraq istintaqa təhvil verilib.

Faktla bağlı araşdırma aparılır.