"Unikal"ın məlumatına görə, Bakı Ağır Cinayətlər Məhkəməsinin hakimi Nigar İmanovanın sədrliyi ilə keçirilən prosesdə təqsirləndirilən şəxs Nuranə Məhərrəmovanın vəkili vəsatətlə çıxış edib. 

Vəkil müvəkkilinin psixi vəziyyətinin yoxlanılması ilə bağlı ekspertizanın keçirilməsini xahiş edib.

Məhkəmə qısa müşavirədən sonra vəsatəti təmin etməyib.

Daha sonra sənədlərin tədqiqinə başlanılıb. 

Daha sonra digər təqsirləndirilən Nəcəf Qafarovun vəkilinin məhkəməyə təqdim etdiyi videogöruntülər nümayiş etdirilib. 

Məhkəmənin növbəti iclası iyunun 23-nə təyin edilib. 

Xatırladaq ki, hadisə 2025-ci il aprelin 21-də paytaxtın Binəqədi rayonunda qeydə alınıb. 

Belə ki, 37 yaşlı Ədil Məhərrəmov fərdi yaşayış evində qəsdən öldürülüb. 

Araşdırmalarla onun əvvəllər məhkum olunmuş 57 yaşlı qayınatası Nəcəf Qafarov tərəfindən qətlə yetirildiyi məlum olub.

Nəcəf Qafarov şübhəli şəxs qismində saxlanılaraq istintaqa təhvil verilib. 

Daha sonra isə onun qızı və qətlə yetirilən Ədil Məhərrəmovun həyat yoldaşı Nuranə Məhərrəmova da hadisə ilə bağlı ittiham edilərək istintaqa cəlb olunub.

Hər iki şəxsə qarşı qarşı Cinayət Məcəlləsinin 120.2.4-cü (Qəsdən adam öldürmə - xüsusi amansızlıqla və ya ümumi təhlükəli üsulla adam öldürmə) və 120.2.1-ci (qabaqcadan əlbir olan bir qrup şəxs tərəfindən adam öldürmə) maddələri ilə ittiham irəli sürülüb.