Son dövrlərdə bir çox işçi əmək müqaviləsinə xitam verilərkən işəgötürən tərəfindən "öz ərizənlə çıx" təklifi ilə qarşılaşdığını bildirir. Bəzi hallarda bu addım işçiyə gələcək karyerasında problem yaşamayacağı və ya "qara siyahıya düşməyəcəyi" kimi arqumentlərlə izah edilir. Lakin ərizə əsasında işdən çıxan şəxs müəyyən hallarda kompensasiya və digər əmək hüquqlarını itirə bilərmi? İşçinin könüllü şəkildə ərizə yazmağa məcbur edilməsi əmək qanunvericiliyinin pozulması riskini yaradırmı? Bəs belə hallarda işçi aldadılırmı və qanun onun hansı hüquqlarını qoruyur?

Məsələ ilə bağlı Median.Az-a açıqlama verən hüquq müdafiəçisi Sahib Məmmədov bildirib ki, işçinin işdən çıxmasına təşəbbüsü işəgötürən irəli sürübsə, həmin şəxs sənəsləşdirməlidir.

S. Məmmədovun sözlərinə görə, işəgötürən işçiyə "ərizəni yaz" deyərək işdən çıxarmağı qanunsuzdur. Belə hallarla rastlaşdıqda, gərək işçi də müqavimət göstərsin, razılaşmasın.

"70 Ç ilə işdən çıxdıqda qara siyahıya düşmək sadəcə olaraq mifdir. Yaxşı işçiyə hər müəssisədə yer var. Artıq əmək kitabçası da yoxdur və dövriyyədən çıxarılıb. Eyni zamanda, əmək kitabçası da tələb oluna bilməz. Lakin elektron sistemdə işçinin hansı maddə ilə işdən çıxarılması qeyd olunur", — deyə hüquq müdafiəçisi əlavə edib.

Mütəxəssis qeyd edib ki, kimsə öz ərizəsi ilə işdən ayrılırsa, bunu sübut etmək çox çətin olur. Təbii ki, bu zaman kompensasiya da tələb edə bilməz. Əgər məhkəmə vasitəsilə sübut edə bilsə ki, o, təqib olunub və məcburi olaraq onu ərizə yazmağa vadar ediblər, bu halda işə bərpa oluna bilsə, kompensasiya ala bilər.

Sahib Məmmədov kompensasiyanın bir neçə halda verildiyini vurğulayıb:

"Ştatlar ixtisar olunduqda, müəssisə ləğv edildikdə, əsgəri xidmətə getdikdə, yaxud da əmək şəraitinin şərtləri dəyişəndə kompensasiya verilir. İşçinin öz xahişi ilə və ya işəgötürənin təşəbbüsü ilə işdən çıxarılma halında 70-ci maddənin Ç və C bəndinə əsasən kompensasiya verilmir, sadəcə olaraq son haqq-hesab ödənilir".

Dəniz Pənahova
Median.Azскачать dle 11.3