ABŞ atəşkəs pozulacağı halda İranın hansı rəsmilərini vuracağını BƏYAN ETDİ

Atəşkəs rejimi pozulacağı təqdirdə ABŞ İranın Hörmüz boğazında yerləşdirdiyi müdafiə sistemlərinə zərbələr endirməyi planlaşdırır.

Bu barədə CNN telekanalı məlumat yayıb.

"Mümkün hədəf variantları arasında Hörmüz boğazı, Fars körfəzinin cənubu və Oman körfəzi ərazisindəki İran obyektləri xüsusi yer tutur. Burada əsasən Tehranın mühüm su yollarını effektiv şəkildə bağlamasına imkan verən kiçik ölçülü sürətli hücum qayıqlarına, mina düzən gəmilərə və digər asimmetrik hərbi vasitələrə yönəlmiş potensial hücumlardan bəhs edilir", - deyə məqalədə vurğulanır.

Telekanalın məlumatına görə, ABŞ silahlı qüvvələri İranı danışıqlar masasına əyləşməyə məcbur etmək məqsədilə ikili təyinatlı hədəflərə və infrastruktur obyektlərinə, o cümlədən enerji sahələrinə zərbələr endirməyi nəzərdən keçirir. Bir neçə hazırkı və sabiq ABŞ rəsmisi xəbərdarlıq edib ki, bu cür hücumlar münaqişənin mübahisəli şəkildə kəskinləşməsi demək olacaq. Hərbi strateqlər, həmçinin, ABŞ rəsmilərinin iddialarına görə danışıqlara fəal şəkildə mane olan bəzi İran hərbi rəhbərlərinə qarşı mümkün zərbə variantını da hazırlayıblar. Bildirilir ki, potensial hədəflər siyahısına İslam İnqilabı Keşikçiləri Korpusunun (SEPAH) baş komandanı da daxildir.

Xatırladaq ki, aprelin 7-də "Politico" jurnalı məlumat yayıb ki, Pentaqon hərbi cinayətlərdə ittiham olunmaqdan qaçmaq üçün hücum hədəflərinin siyahısını genişləndirmək və buraya həm mülki əhalini, həm də hərbçiləri yanacaq və elektrik enerjisi ilə təmin edən ikili təyinatlı obyektləri daxil etmək qərarına gəlib.