Reper "50 Cent" barədə sənədli serial çəkiləcək
Bu barədə "Deadline" nəşri məlumat yayıb.
"Hulu" platforması bu layihə üçün Körtis Ceksona 75 milyon dollar qonorar ödəyib. Üçhissəlik serial reperin çətin uşaqlıq illərini, musiqi karyerasının başlanğıcını və dünyanın ən populyar hip-hop ifaçılarından birinə çevrilmə yolunu əhatə edəcək. Sənədli film sənətçinin təkcə musiqidəki deyil, həm də kino və biznes sahələrindəki uğurlarını nümayiş etdirəcək.
Ekran işi maneələri böyük bir mədəni irsə çevirə bilən güclü xarakteri tamaşaçılara səmimi şəkildə təqdim edəcək. Layihənin rejissoru daha öncə "Hip-hopun mənşəyi" sənədli filminə rəhbərlik etmiş Mandon Lovettdir. İstehsal prosesini "Intellectual Property Corporation" (IPC) ilə yanaşı, reperin şəxsi "G-Unit Film & Television" şirkəti həyata keçirir. Serialın yayım tarixi hələlik açıqlanmayıb.
Xatırladaq ki, hazırda Körtis Ceksonun 50 yaşı var. Yaradıcılığa 1996-cı ildə qədəm qoyan sənətçi "Get Rich or Die Tryin'" və "The Massacre" adlı albomları ilə dünya şöhrəti qazanıb. İndiyədək "50 Cent"in qlobal səviyyədə 30 milyondan çox albomu satılıb.
