Böyük Britaniya Kiprə qırıcı təyyarələr yerləşdirdi: Səbəb İrandır

Böyük Britaniya İran ətrafındakı vəziyyət fonunda regional təhlükəsizliyi gücləndirmək məqsədilə Kiprdəki Akrotiri aviabazasına öz qırıcı təyyarələrini göndərib.

Bu barədə "The Times" qəzeti məlumat verib.

Altı "F-35B" qırıcı təyyarəsi artıq İraq və Suriya üzərində döyüş tapşırıqlarını yerinə yetirmək üçün Kiprdə olan "Typhoon" qırıcıları ilə birlikdə xidmətə başlayacaq. Texnika artıq Böyük Britaniyanın şərqindəki Marham bazasını tərk edib.

Qeyd edək ki, daha əvvəl - fevralın 4-də ABŞ-İran görüşünün nüvə proqramından başqa istənilən mövzunun görüşdən çıxarılması tələbi səbəbindən birdəfəlik ləğv edildiyi açıqlanmışdı. İran həmçinin Vaşinqtonla bütün razılaşmaların ABŞ sanksiyalarının qaldırılması ilə müşayiət olunmasını tələb etmişdi.

Daha sonra Donald Tramp İran ali lideri Əli Xameneiyə danışıqların ləğvindən sonra çox narahat olmağı məsləhət görüb.