ABŞ-ın Venesuela prezidenti Nikolas Maduronu ələ keçirmək üçün keçirdiyi hərbi əməliyyat nəticəsində təxminən 75 nəfər həlak olub.

Bu barədə "The Washington Post” (WP) məsələdən agah olan rəsmilərə istinadla yazır.

Mənbələrin bildirdiyinə görə, ölənlərin sayı 67 ilə 80 nəfər arasında dəyişir. Bu rəqəmə Venesuela və Kubanın təhlükəsizlik qüvvələrinin əməkdaşları, həmçinin Maduronun Karakasdakı iqamətgahında baş verən intensiv atışma zamanı döyüşlərin mərkəzində qalan mülki şəxslər daxildir. ABŞ-ın təxminləri Venesuela tərəfinin daha əvvəl açıqladığı məlumatlarla üst-üstə düşür.

Prezident Donald Tramp əməliyyatı "effektiv", lakin eyni zamanda "çox amansız" adlandırıb.

Reyd zamanı 6-ya yaxın ABŞ hərbçisi yaralanıb. Onlardan bəziləri Maduronun kompleksi ərazisindəki döyüşdə güllə yarası alıb. Yaralılar Texasdakı hərbi tibb mərkəzinə aparılıb. Pentaqon iki hərbçinin hələ də reabilitasiya keçdiyini, digərlərinin isə artıq xidmətə qayıtdığını bildirib.

"Bu dərəcədə mürəkkəb missiyanın hərbçilərimiz arasında minimal itki ilə tamamlanması birləşmiş qüvvələrin yüksək hazırlıq səviyyəsindən xəbər verir", — deyə Pentaqon bəyan edib.

Əməliyyatın gedişatı:
•İştirakçılar: Elit Delta Force bölməsi, 75-ci Reyncers alayı və 160-cı xüsusi əməliyyat aviasiya alayı.
•Taktika: Helikopterlər Venesuela sahillərindəki ABŞ hərbi gəmilərindən havaya qalxaraq radarlara düşməmək üçün çox aşağı hündürlükdə hədəfə yaxınlaşıblar.
•Qarşıdurma: Desant zamanı ABŞ qüvvələri qurudan intensiv atəşə məruz qalıblar və cavab atəşi açıblar. Bir helikopter zədələnsə də, uçuşu davam etdirə bilib.

Geosiyasi nəticələrə gəlincə, qeyd edək ki, Rusiya hələ 7 il əvvəl Vaşinqtonun Kremlə Ukraynada tam fəaliyyət azadlığı verməsi müqabilində Venesuelada ABŞ-ın istədiyi kimi hərəkət etməsinə göz yummağa hazır olduğunu göstərmişdi.

Eyni zamanda, "Politico” nəşri yazır ki, Maduronun ildırım sürəti ilə saxlanılması təkcə Vaşinqtonun güc nümayişi deyil, həm də Vladimir Putinin qlobal oyunçu kimi nüfuzuna vurulan ciddi zərbədir.
//qaynar.azскачать dle 11.3