İstirahət mərkəzinə getdi, kababdan xoşu gəlmədi, dava saldı

Göyçay rayonu, Kürd Şaban kəndində yerləşən "Murad" İstirahət Mərkəzində kababdan xoşu gəlməyən müştəri dava saldığına görə cərimələnib.

Qaynarinfo-nun məlumatına görə, 1987-ci ildə Ucar rayonunun anadan olmuş Nuran Cəfərov (soyad şərti) barəsində Cinayət Məcəlləsinin 221.1-ci maddəsi ilə cinayət işinə məhkəmədə baxılıb.

Məlulum olub ki, Nuran dostları ilə sözügedən istirahət mərkəzində spirtli içki qəbul edib. Sonuncu sifarişləri bir şiş böyrək kababı olub. Lakin, kabab gətiriləndə şişə 3 ədəd piy içərisində böyrək, 2 ədəd də ciyər qoyulduğunu görüb. Buna etiraz edib, kafenin mətbəxinə gedərək Rəvan adlı kababçıya niyə istədiyi formada kabab göndərməməsinin səbəbini soruşub. Bir az söhbət edərək yerinə qayıdıb. Nuran bildirib ki, həmin vaxt aralarında heç bir dava-dalaş olmayıb.

Bir qədər sonra hesabı vermək üçün kassa yaxınlaşıb. Bu zaman kababın yaxşı olmadığını bildirib. Restoran işçisi Tacəddin isə ona "yesən də, yeməsən də, budur" deyə cavab verib. Bu zaman mübahisə yaranıb və Nuran Tacəddini döyüb. Onun haqqında polisə şikayət olunub.

Məhkəmənin hökmü ilə Nuran Cəfərov 1000 manat miqdarında cərimə edilib. Təqsirləndirilən şəxs barəsində seçilmiş "polisin nəzarəti altına vermə” qətimkan tədbiri hökm qanuni qüvvəyə minənədək dəyişdirilmədən saxlanılıb.