Bu aviaşirkət poverbanklardan istifadəni qadağan edir

2025-ci il oktyabrın 1-dən etibarən “Emirates” aviaşirkətinin bütün reyslərində sərnişinlərə poverbanklardan istifadə etmək və uçuş zamanı cihazları şarj etmək qadağan olunur. Şirkətin saytında dərc olunan açıqlamaya görə, sərnişinlər yalnız bir ədəd poverbank daşıya biləcək və bu qurğu yalnız əl yükündə saxlanılmalıdır. Çek-in edilmiş yüklərdə isə poverbank daşınmasına icazə verilməyəcək.

Valyuta.az xəbər verir ki, yeni qaydalar çərçivəsində hər sərnişinə maksimum 100 vat-saatlıq poverbank limiti müəyyən olunub. Qurğular uçuş zamanı istifadə edilməməli və yalnız oturacağın altı və ya cibində saxlanılmalıdır. “Emirates” qərarı təhlükəsizlik məqsədi ilə qəbul etdiyini bildirib. Qeyd olunub ki, litium-ion batareyalar həddindən artıq qızdıqda və ya zədələndikdə yanğın və partlayış riski yaradır.

Eyni zamanda, “Etihad Airways” də açıqlama yayaraq sərnişinlərin Bluetooth səsgücləndiricilərini həm əl yükündə, həm də baqajda daşıya biləcəyini bildirib. Lakin bu cihazların tam sönülü vəziyyətdə olması və zədələnmədən qorunması tələb olunur. Şirkət xatırladıb ki, poverbank, ehtiyat batareya və elektron siqaretlərin baqajda daşınması qadağandır.