Xırdalan sakinləri suya həsrət qalıblar: Problem nə vaxt həll olunacaq? - Video

İsti yay günlərində paytaxtın bəzi ərazilərində suyun verilməməsi və uzun fasilələrlə təmin olunması sakinləri çıxılmaz vəziyyətə salıb.

Bu problemdən əziyyət çəkənlərin bir qismi Xırdalan sakinləridir. Onlar bildirirlər ki, artıq bir aya yaxındır ki, su üzünə həsrət qalıblar. Şikayətçilər qeyd edirlər ki, müraciətlərinə baxmayaraq, hələ də problemin həlli ilə bağlı ciddi addım atılmayıb.

"Susuzluqdan çox əziyyət çəkirik. Evdə körpə uşağım var, bu vəziyyətdə yaşamaq mümkün deyil", - deyə sakinlərdən biri şikayətini bölüşüb.

Məsələ ilə bağlı yaşayış kompleksinin komendantı açıqlama verib. O bildirib ki, narazılıqlar əsasən suyun yalnız səhər və axşam saatlarında, o da fasilələrlə verilməsi ilə bağlıdır. Komendant əlavə edib ki, mövcud su çəni sakinlərin sayının çoxluğuna görə tələbatı tam qarşılamır. Buna görə də yaxın zamanda ərazidə əlavə su çəninin tikintisi nəzərdə tutulur.

İri Şəhərlərin Birləşmiş Su Təchizatı Xidmətindən isə bildirilib ki, Bakı və Abşeron yarımadasında havaların həddindən artıq isti keçməsi suya olan tələbatı xeyli artırıb. Bu səbəbdən mərkəzi su anbarlarında ehtiyatlar azalıb. Bəzi ərazilərdə məhz bu səbəbdən suyun fasilələrlə verilməsi qərara alınıb. Qurumdan bildirilib ki, yaxın günlərdə problemin aradan qaldırılması gözlənilir.

Ətraflı Baku TV-nin süjetində:скачать dle 11.3

Şahidi olduğunuz hadisələri çəkib bizə göndərin!