Rusiyada qubernator Paşinyanın uydurma kəndlə bağlı sözlərinə cavab verdi

"Kaluqa vilayətində sənaye istehsalının həcmi bütün Ermənistandakı eyni göstəricini təxminən iki dəfə üstələyir".

Median.Az-ın RT telekanalına istinadən verdiyi xəbərə görə, bunu Rusiyanın Kaluqa vilayətinin qubernatoru Vladislav Şapşa Ermənistanın baş naziri Nikol Paşinyanın Kaluqada uydurma "kənd" ilə bağlı sözlərini şərh edərkən söyləyib.

O qeyd edib ki, rəhbərlik etdiyi regionda çoxlu kənd var: "Onlardan birində, məsələn, Dobrino kəndində xüsusi iqtisadi zonanın məkanlarından biri yerləşir".

Qeyd edək ki, Paşinyan "Taşir" şirkətlər qrupunun rəhbəri Samvel Karapetyana müraciət edərək "bura sizin üçün Kaluqanın Aşağı Tapr kəndi deyil. Bura Ermənistandır" demişdi.

Sonradan məlum olduğu üzrə, Kaluqada belə bir kənd yoxdur.

Xatırladaq ki, Ermənistanın Daxili İşlər Nazirliyinin Mütəşəkkil Cinayətkarlıqla Mübarizə Baş İdarəsinin əməkdaşları erməniəsilli rusiyalı iş adamı, "Taşir" şirkətlər qrupunun prezidenti və təsisçisi Samvel Karapetyanı saxlayıblar.

Ermənistanın istintaq orqanları Karapetyanı ölkədə hakimiyyətin ələ keçirilməsinə açıq çağırışlarda ittiham edib.