Əksər insanlar səyahət etməyi sevsə də, təyyarə biletlərinin baha olması bu arzunu reallaşdırmağı çətinləşdirir. Xüsusilə də bayram və yay mövsümündə qiymətlər sürətlə artdığı üçün öncədən planlama vacib olur. Bəzi üsul və vərdişlərlə aviabiletləri daha sərfəli qiymətlərlə əldə etmək mümkündür. Bu, nəinki büdcəyə qənaət etməyə, həm də daha çox istiqamətə səyahət etməyə imkan yaradır. 

Valyuta.az səyahət sevərlər üçün aviabiletibiletini daha sərfəli qiymətə almağın 7 praktik yolunu təqdim edir.

Meta-axtarış sistemlərindən istifadə edin

Bu platformalar müxtəlif aviaşirkətlərin və səyahət saytlarının təkliflərini bir araya gətirərək sizə ən uyğun və sərfəli bilet variantlarını göstərir. Belə sistemlər birbaşa bilet satmasa da, sizi həmin təklifi təqdim edən sayta yönləndirir. Skyscanner, Google Flights və Momondo kimi platformalar bu məqsədlə ən çox istifadə olunan meta-axtarış sistemləridir. Onların köməyi ilə vaxt itirmədən və fərqli saytlara daxil olmadan rahat şəkildə bilet müqayisəsi və sifarişi edə bilərsiniz.

Bileti əvvəlcədən alın

Uçuş tarixindən ən azı 1–2 ay əvvəl alınan biletlər, adətən, daha ucuz olur. Eyni zamanda, bəzi hallarda hava yolları reysdə boş qalan yerləri doldurmaq üçün son anda endirim kampaniyaları keçirə bilər. Ancaq bu fürsətlərə arxalanmaq risklidir. Ən yaxşı yol, erkən rezervasiyadır.
Əlavə tövsiyə: çərşənbə axşamı, çərşənbə və cümə axşamı günləri, həmçinin səhər və axşam saatlarında uçuşlar daha sərfəlidir.

Gediş-dönüş bileti alın

Bəzi hallarda yalnız “gediş” bileti almaqdansa, gediş-dönüş bileti daha ucuz başa gəlir. Xüsusilə beynəlxalq uçuşlarda bu üsul daha sərfəlidir. 

Tarix və istiqamətlərdə çevik olun

Səyahət tarixində və hava limanında çeviklik ucuz bilet tapmaq şansınızı artırır. Məsələn, əsas şəhərin hava limanı əvəzinə qonşu şəhərə uçmaq daha sərfəli ola bilər. Həmçinin, səyahətinizi iki hissəyə bölmək – əvvəl ölkəyə ucuz uçuşla getmək, sonra isə daxili nəqliyyatla davam etmək də qənaətlidir.

Hava yollarının bülletenlərinə abunə olun

Hətta yaxın vaxtlarda səyahət etməyi planlamırsınızsa belə, hava yollarının və səyahət saytlarının e-poçt bülletenlərinə abunə olun. Beləliklə, endirim kampaniyaları, promo kodlar və “last minute” təkliflər haqqında ilk siz xəbər tutacaqsınız. Lakin diqqətli olun, bəzən adi qiymətlər endirim adı ilə təqdim olunur. Qiyməti bir neçə mənbədə yoxlayın.

İnkoqnito rejimindən istifadə edin

İnkoqnito rejiminin nə olduğuna nəzər salaq. İnkoqnito rejimi brauzerin internetdə gəzişmə zamanı axtarış tarixçəsi və kukilər kimi məlumatları yadda saxlamadığı gizli rejimdir. Aviaşirkətlər bilet axtarışlarını təkrar gördükdə qiymətləri süni şəkildə artıra bilər, lakin inkoqnito rejimində bu məlumatlar izlənilmədiyi üçün qiymətlər daha dəyişməz qalır.

Aşağı büdcəli və icarə reyslərini izləyin

Low-cost (aşağı büdcəli) aviaşirkətlərdə əsas xidmətlər (məsələn, baqaj, yemək və s.) bilet qiymətinə daxil olmasa da, uçuşlar adətən daha ucuz olur. Digər tərəfdən, icarə reyslər (müəyyən bir qrup və ya təşkilat tərəfindən sifariş olunmuş, müntəzəm cədvələ daxil olmayan xüsusi uçuşlar) də sərfəli seçim ola bilər. 

Turoperatorlar tərəfindən rezerv edilmiş, lakin satılmayan yerlər uçuşdan 48 saat əvvəl daha aşağı qiymətlərlə satışa çıxarılır. Bu reyslər, əsasən, məşhur turistik istiqamətlərə olur.

Ucuz bilet tapmaq şans işi deyil, araşdırma, planlama və düzgün alətlərin istifadəsi ilə mümkündür. Yuxarıdakı 7 tövsiyəni tətbiq etməklə həm xərclərinizə qənaət edə, həm də daha çox səyahət edə bilərsiniz.скачать dle 11.3