Cənub rayonlarında güclü qar elektrik şəbəkələrində qəzalara səbəb oldu

"Fevralın 6-7-də yağan güclü qar ölkə ərazisində, xüsusən cənub rayonları - Astara, Lerik və Yardımlının digər sahələrdə olduğu kimi, elektrik təsərrüfatında da fəsadların yaranmasına səbəb olub".

Bu barədə "Azərişıq" ASC-nin Mətbuat Xidmətindən məlumat verilib.

Bildirilib ki, elektrik xətlərinin zədələnməsi nəticəsində hər 3 rayonda 0.4 və 10 kV-luq xətlərin keçdiyi bir sıra dağlıq kənd və qəsəbələr işıqsız qalıb. "Azərişıq" ASC-nin Lənkəran, Masallı, Cəlilabad, həmçinin qəza baş verən rayonların elektrik şəbəkələrinin əməkdaşları ilk gündən iş başında olublar. Həyata keçirilən bərpa işləri nəticəsində ümumi ərazi gərginliklə təmin edilib. Dağlıq ərazilərdə qarın səviyyəsinin bir metrə çatması nəticəsində tamamilə bağlanan yollarda "Azərişıq" ASC xüsusi texnikalarla yolları açıb, əməkdaşların qəza yerlərinə çatmasına şərait yaradıb".

"Yağan qarın hündürlüyünə və kəskin hava şəraitinə baxmayaraq, əməkdaşlarımız qəzaların aradan qaldırılması istiqamətində 24 saat fasiləsiz çalışmalarını davam etdiriblər. Qeyd edilən rayonlarda qısa vaxt ərzində elektrik enerjisinin verilişi tamamilə bərpa olunub", - deyə məlumatda bildirilib.