Talassemiyalı uşaqlar üçün toplanmış bir milyonluq vəsaiti dələduzluq yolu ilə ələ keçirməkdə təqsirləndirilən şirkət sahibi Nuridə Seyidova və digər iki nəfər – Aynur Bayramova və Aysel Məmmədovanın cinayət işi üzrə məhkəmə prosesi keçirilib.

Bakı Ağır Cinayətlər Məhkəməsinin hakimi Azad Məcidovun sədrliyi ilə keçirilən prosesdə cinayət işi üzrə təqsirləndirilən Aysel Məmmədovanın istintaqa verdiyi ifadə elan olunub.

Belə ki, o ifadəsində "Çinar Plaza"da Nuridə Seyidovaya 25 min manat pul verdiyini, Nuridə Seyidovanın da üzərinə 5 min manat qoyaraq ona 30 min manat Mərkəzi Klinikaya köçürmək üçün verdiyini deyib. Həmçinin zərərçəkən Nərgiz Mahmudovadan 9 min manat pulu alıb Toğrul adlı şəxsin yanında Nuridə Seyidovaya verdiyini bildirib.

Hakim qeyd edib ki, Aysel Məmmədova istintaqda ifadəsində "sponsor Qalib" adlı şəxsdən danışıb. A.Məmmədova cavabında deyib ki, sözügedən adamın övladı talassemiya xəstəsidir. O, övladını Türkiyədə əməliyyat etdirmək istəyib. A.Məmmədovanın sözlərinə görə, Şəbnəm adlı xanım "sponsor Qalib"dən daha iki nəfəri də əməliyyat etdirməyi istəyib.

"Danışığımız belə olmuşdu ki, biz xəstələri cəlb edirik, Nuridə isə Türkiyədə əməliyyat etdirirdi. Xəstələrdən aldığımız pulun üçdə bir hissəsini dörd yerə bölməli idik. Əməliyyat məbləğinin çatışmayan hissəsinin haradan gəldiyini bilmirdik. Bu barədə Nuridə bizə heç nə demirdi. Türkiyədə əməliyyat olunan üç xəstəyə görə kommisiya alsam da, dördüncü xəstəyə görə almadım. Nuridə Türkiyədə özəl şirkətlərlə müqavilə bağladığı üçün etibar qazanmışdı", - A. Məmmədova istintaqda deyib.

Hakim Nuridə Seyidovadan ifadə verməsini istəyib. O, xəstə olduğunu bildirib, ifadə verə bilməyəcəyini deyib.

"Pulları alanda xəstəliyin yadına düşmürdü. İfadə verməsən, sənin istintaqa verdiyin ifadəni əsas götürəcəyik", - hakim Nuridə Seyidovaya cavabında bildirib.

Zərərçəkənlər N.Seyidovanın ifadə vermək istəməməsinə etiraz ediblər, həmçinin bildiriblər ki, talassemiya xəstəliyindən əziyyət çəkən, eləcə də əməliyyat olunmalı olan uşaqlardan üçü ölüb.

Məhkəmənin növbəti iclası iyulun 3-nə təyin olunub.

Qeyd edək ki, talassemiyalı xəstələrin valideynlərinin Daxili İşlər Nazirliyinə müraciətindən sonra faktla bağlı cinayət işi başlanılıb. İstintaqla müəyyən edilib ki, Nuridə Seyidova digərləri ilə əlbir olaraq 36 nəfər talassemiya xəstəsinin valideynlərinin etibarından sui-istifadə edərək həmin şəxslərin övladlarını Türkiyədə müalicə etdirmək adı ilə 1 milyon manata yaxın dələduzluq edib. Xanım müttəhimlərə qarşı Cinayət Məcəlləsinin 178.4-cü ( dələduzluq-xüsusilə külli miqdarda ziyan vurmaqla törədildikdə) maddəsi ilə ittiham irəli sürülüb.
//Reportскачать dle 11.3