Ərdoğan dəhşətli zəlzələlərin vurduğu ziyanı açıqladı
Türkiyə Prezidenti Rəcəb Tayyib Ərdoğan 2023-cü ilin fevral ayında baş vermiş dağıdıcı zəlzələlərdən Türkiyə iqtisadiyyatına 104 milyard dollar ziyan dəydiyini bildirib.
"Bütün bu problemlərə əlavə olaraq, Türkiyədə 6 fevralda baş verən zəlzələlər nəticəsində 53 mindən çox insan həyatını itirdi. Ümumilikdə 11 vilayətə və 14 milyon insana təsir edən zəlzələlərin iqtisadiyyatımız üçün ziyanı 104 milyard dollara çatdı, təkcə evlərdə deyil, həm də istehsal obyektlərində dağıntılar oldu", - deyə Türkiyə lideri Xarici İqtisadi Əlaqələr Şurasının 37-ci Baş Assambleyasında çıxışı zamanı bildirib.
Onun sözlərinə görə, Türkiyənin cənub-şərqində ticarət evləri dağıdılıb, müəssisələr bağlanıb, şəhərlərin infrastrukturuna ciddi ziyan dəyib.
"Zəlzələ zonasında yararsız vəziyyətə düşmüş 850 min obyektdən 170 mini iş yeridir, Avropa və ABŞ də daxil olmaqla, heç bir iqtisadiyyat nə qədər inkişaf etsə də, belə bir fəlakətin öhdəsindən asanlıqla gələ bilməz", - Ərdoğan vurğulayıb.
Xatırladaq ki, fevralın 6-da Türkiyənin cənub-şərqindəki Kahramanmaraş vilayətində 7,7 və 7,6 bal gücündə zəlzələlər doqquz saat fərqlə baş verib. Yeraltı təkanlar ölkənin 11 vilayətində və Suriya da daxil olmaqla, digər qonşu ölkələrdə hiss olunub. Son məlumatlara görə, təbii fəlakət zamanı Türkiyədə 53 mindən çox insan həyatını itirib.
Mənbə: RİA Novosti
