Daşkəsəndə yer təkinin istifadə qaydalarını pozanlar aşkarlandılar

Daşkəsən Rayon Polis Şöbəsinin (RPŞ) əməkdaşları tərəfindən rayon ərazisində yer təkinin istifadə qaydalarının pozulmasına qarşı monitorinq tədbirləri davam etdirilir.

Daxili İşlər Nazirliyinin Mətbuat Xidmətinin Gəncə regional qrupundan verilən məlumata görə, Daşkəsən RPŞ-nin əməkdaşlarının keçirdikləri monitorinq zamanı rayonun Əmirvar kəndi ərazisində qanunsuz olaraq “KamAZ” markalı yük avtomobili ilə dağ süxurunun daşınması faktı aşkarlanıb. Faktla bağlı sürücü barəsində İnzibati Xətalar Məcəlləsinin 228-ci (İcazə olmadan və ya icazə şərtlərini pozmaqla yerin təkindən istifadə etmə) maddəsi ilə protokol tərtib olunub.

Bundan başqa, şöbə əməkdaşlarının Ekologiya və Təbii Sərvətlər Nazirliyinin 10 saylı regional idarəsinin əməkdaşları ilə birlikdə keçirdikləri monitorinq zamanı rayonun Quşçu kəndində qalaqlanmış və yandırılmış məişət tullantıları aşkarlanıb. Faktla bağlı ETSN-in əməkdaşları tərəfindən müvafiq sənədləşmə aparılıb.