Analitiklərdən proqnoz: “Bitcoin”in dəyəri 50 000 ABŞ dollarını keçə bilər

Uzunmüddətli perspektivdə dünyanın ən populyar kriptovalyutası olan “Bitcoin”in dəyəri 50 000 ABŞ dollarını keçə bilər.

“Bloomberg” xəbər verir ki, “Luno” kripto birjası və OSK broker şirkətinin analitikləri kriptovalyutanın dəyərinin dinamikasını belə proqnozlaşdırıblar.

Analitiklərin fikrincə, “Bitcoin”in populyarlığı yaxın 3-10 ildə arta bilər, qızıl isə əksinə, investorlar tərəfindən bəyənilməmək riskini daşıyır.

Son bir ildə “Bitcoin”in qiyməti dörd dəfə artıb və 2021-ci ilin yanvar ayının əvvəlinə qədər 42 min dollar olub. Sonra kriptovalyutanın qiyməti düşüb və təxminən 10 min dollar dəyər itirib.

“Coindesk”in məlumatlarına görə, “Bitcoin”in qiyməti günorta saatlarında təxminən 31,4 min dollar olub.

2020-ci ilin sonu - 2021-ci ilin əvvəlində “Bitcoin”in populyarlığındakı artım analitiklər tərəfindən müxtəlif yollarla izah olunur.

Bəziləri artımın spekulyativ əməliyyatlarla, digərləri uzunmüddətli investorların maraqlarının artması ilə əlaqəli olduğuna inanırlar.

Bununla birlikdə, kapitalın etibarlı idarə olunması ilə məşğul olan şirkətlərin kriptovalyuta investisiyalarına vəsaitlərin 0,5 faizdən 1 faizə qədərini ayırdıqlarına görə, planetin ən populyar kriptovalyutasının dəyərinin uzun müddətli artması gözlənilir.