Lerikdə torpaq sürüşməsi ərazisində yerləşən evlər təhlükəli vəziyyətlə üzləşib

Lerik rayonunun Veri-Əliabad kəndi dağ yamacında yerləşir.

“Report”un Cənub Mərkəzinin verdiyi xəbərə görə, kənddə 1 hektar ərazidə torpaq sürüşməsinin aktivliyi hər gün artmaqdadır. Bu, sakinləri narahat edir. Onlar təhlükəli vəziyyətin aradan qaldırılmasını istəyirlər.

Lerik Rayon İcra Hakimiyyəti başçısının müavini, fövqəladə hallar üzrə komissiyanın sədri Habil Məlikov bildirib ki, hazırda ərazidə daha çox sürüşməyə məruz qalan, bu səbəbdən uçma təhlükəsi ilə üzləşən üç fərdi yaşayış evi var: “Orada vətəndaşların yaşaması düzgün deyil, çünki təhlükə var. Biz bununla bağlı vətəndaşlara rəsmi olaraq, yazılı şəkildə müraciətlər etmişik. Bildirmişik ki, onlar evlərindən köçməlidirlər. Əks halda baş verə biləcək xoşagəlməz hadisənin məsuliyyəti onların üzərinə düşür.

Problemin həll edilməsi istiqamətində Fövqəladə Hallar, Ekologiya və Təbii Sərvətlər nazirliklərinə, Nazirlər Kabinetinə müvafiq məlumatlar göndərilib. Əraziyə baxış keçirilib, monitorinq aparılıb”.

O, qeyd edib ki, ərazidə torpaq sürüşməsi 2005-2006-cı illərdə başlayıb. Nəticədə üç fərdi yaşayış evi və məktəb binası qəzalı vəziyyətə düşüb. Ötən il məktəb binası sökülərək yerində yenisi inşa olunub. Qəzalı evlərə isə daha ikisi əlavə olunub.

скачать dle 11.3

Şahidi olduğunuz hadisələri çəkib bizə göndərin!