Rusiyada qanunsuz tütün məhsulları satan azərbaycanlı saxlanıldı

Rusiyanın Sverdlovsk vilayətində qanunsuz tütün məhsulları satan azərbaycanlı saxlanılıb.

Bu barədə Tagilsity.ru vilayət Prokurorluğunun mətbuat xidmətinə əsasən xəbər yayıb.

Xəbərdə bildirilir ki, 45 yaşlı Azərbaycan vətəndaşı Yekaterinburqda aksiz markaları olmayan tütün məhsulları satıb.

İstintaq zamanı məlum olub ki, o, qaraj icarəyə götürərək anbar kimi istifadə edib. Sonra isə aksiz markası olmayan 159 məşhur marka tütün qutusu əldə edərək satıb.

Qarajda saxlanılan 70 qutu tütün məmulatının ümumi dəyəri 2,3 milyon rubl (59,110 AZN) təşkil edib.

Qanunu pozan azərbaycanlı ilə bağlı məhkəmə prosesi keçiriləcək.