Tanışını taxta parçası ilə döyərək öldürənin şikayəti təmin edilməyib

Bakı Apellyasiya Məhkəməsində qətl törətməkdə təqsirləndirilən Bahadur Cəfərovun şikayəti üzrə baxış başa çatıb.

Median.Az-ın report-a istinadən xəbərinə görə, hakim Namiq Cədərovun sədrliyi ilə keçirilən prosesdə qərar elan edilib. Qərara əsasən, şikayət təmin edilməyib və B.Cəfərov barəsindəki hökm dəyişdirilmədən saxlanılıb.

Qeyd edək ki, B.Cəfərov Bakı Ağır Cinayətlər Məhkəməsinin hökmü ilə 16 il müddətinə azadlıqdan məhrum edilib. O, Cinayət Məcəlləsinin 120.2.4-ci (xüsusi amansızlıqla və ya ümumi təhlükəli üsulla adam öldürmə) maddəsi ilə təqsirli bilinib.

Hadisə ötən il sentyabrın 11-də Bakı şəhərinin Sabunçu rayonu ərazisində qeydə alınıb. Həmin rayonda yaşayan, əvvəllər məhkum olunmuş B.Cəfərov evində münaqişə zəminində paytaxt sakini olan tanışı Rəfayel Rzayevi taxta parçası ilə döyərək qətlə yetirib.