Bakı Ağır Cinayətlər Məhkəməsində Siyəzən şəhər sakini Orxan Hasilovun (1991-ci il təv.) CM-nin 126.1-ci (qəsdən sağlamlığa ağır zərər vurma) maddəsi ilə təqsirləndirilməsinə dair cinayət işi üzrə məhkəmə prosesi başa çatıb.
Median.Az xəbər verir ki, ittiham aktına əsasən, Siyəzən şəhərində Orxan Hasilov eyni qəsəbədə yaşadığı İbadi Poladovu bıçaqlayıb. Buna səbəb sonuncunun Orxanın dostunun anasının nömrəsini istəməsi, ona qarşı əxlaqsız hərəkət etmək niyyətində olması olub.
Belə ki, İbadi Poladov qəsəbədə yaşayan Rüfət adlı şəxsdən Orxanın dostunun anasının nömrəsini istəyib. Bu zaman Rüfətlə İbadi mübahisə edib. Mübahisə əlbəyaxa davaya çevrilib və İbadi Rüfəti döyüb.
Bundan xəbər tutan Orxan məsələni özü həll etməyi qərarlaşdırıb. Rüfət İbadiyə zəng edərək görüşə çağırıb. İbadi ilə görüşə Orxan sinif yoldaşları Rüfət və Elşadla gedib. Orxan İbadidən etdiyi hərəkətin səbəbini soruşub. İbadi isə ona hesabat verməyəcəyini deyib. Dava zamanı Orxan üzərindəki bıçaqla İbadinin ayağına 2 zərbə endirib.
Məhkəmənin hökmü ilə təqsirləndirilən şəxs 4 il müddətinə azadlıqdan məhrumetmə cəzasına məhkum olunub.