Ötən ilin ilk yarısında sığınacaqla bağlı mənfi cavab alan 138 Azərbaycan vətəndaşı Almaniyadan deportasiya edilib.
"Report" xəbər verir ki, həmin şəxslərdən 98-i təyyarə, 40 nəfər isə quru yolu vasitəsilə Azərbaycana geri qaytarılıb.
Hava limanında göstərdiyi müqavimət səbəbindən üç nəfərin deportasiyası baş tutmayıb. Bir nəfərin isə səhhətində problem yaşandığı üçün onu ölkədən çıxarmaq mümkün olmayıb.
Məlumata görə, 85 azərbaycanlı Dublin konvensiyasına uyğun olaraq Avropa İttifaqında gəldikləri ilk Şengen dövlətinə göndəriliblər. Onların 27-si 18 yaşına çatmamış şəxslər olub.
Sığınacaqla bağlı mənfi cavabı alan 333 azərbaycanlı Almaniyanı könüllü olaraq tərk edib. 269 Azərbaycan vətəndaşı isə Almaniya hökümətinin həyata keçirdiyi Repatriasiya Proqramı çərçivəsində maliyyə yardımı müqabilində ölkəni könüllü tərk etməyə razı olublar. Bundan başqa, ötən ilin ilk yarısında altı azərbaycanlı Almaniya hava limanlarındakı sərhəd buraxılış məntəqələrindən, bir nəfər isə quru sərhəddən ölkəyə buraxılmayıb.
2016-cı ildə isə sığınacaq müraciətinə mənfi cavab alan 93 azərbaycanlı ölkədən deportasiya edilib. Onların 87 nəfəri təyyarə ilə Azərbaycana, yerdə qalanları isə başqa ölkələrə göndərilib. Ötən il olduğu kimi 2016-cı ildə də hava limanlarında polisə göstərdiyi müqavimət səbəbindən üç nəfərin deportasiyası baş tutmayıb. Bir nəfərin isə halı qəfil pisləşdiyi üçün deportasiyası təxirə salınıb.
2015-ci ildə isə ümumilikdə 26 azərbaycanlı Almaniyadan çıxarılıb. Onlardan 19-cu təyyarə ilə Azərbaycana göndərilib, digərləri başqa ölkələrə. Bir nəfər hava limanında müqavimət göstərdiyi üçün deportasiyası təxirə salınıb. 136 Azərbaycan vətəndaşı maliyyə yardımı müqabilində Almaniyanı könüllü tərk edib.
Bildirilib ki, 23 nəfər hava limanından, bir nəfər isə quru sərhəddən ölkəyə buraxılmayıb. Səkkiz nəfərə qarşı Dublin konvesiyası tətbiq edilərək digər Aİ ölkələrinə göndəriliblər.
Almaniya Bundestaqının rəsmi saytında yerləşdirilən hesabatda bu ölkədən deportasiya edilən digər dövlətlərin vətəndaşları barədə məlumatlar da yer alıb. Məlumata görə 2014-cü ildə Almaniyadan 120-dən artıq ölkənin 8557 vətəndaşı məcburi çıxarılıb. Həmin il ölkədən çıxarılanlar arasında birinci yeri Serbiya vətəndaşları (2 127 nəfər), ikinci yeri İtaliya vətəndaşları (830 nəfər), üçüncü yeri Makedoniya vətəndaşları (635 nəfər) tutub. 27 nəfər isə Azərbaycan vətəndaşları olub.
Şahidi olduğunuz hadisələri çəkib bizə göndərin!
Son Əlavə