Falçı Hüseyn Əlizadə və onun anası Lalə İbrahimova küllü miqdarda dələduzluq etdiklərinə görə Bakı Şəhər Baş Polis İdarəsi tərəfindən saxlanılıblar.
Məşhur ana-bala barəsində 2 ildən artıqdır ki, çoxsaylı şikayətlər var idi. Lalə İbrahimova Bibiheybət qəsəbəsi, I məktəbli döngəsi, ev 4-də qeydiyyatda olsa da, Salyan yolu 32-də yaşayıb və Mərkəzi Univermaqda qızıl mağazasında satıcı işləyib. Oğlunun falçılıq yolu ilə ələ keçiridiyi qızılları isə elə işlədiyi qızıl şöbəsində satıb.
Median.Az “ölkə.az”a istinadən xəbər verir ki, falçı Hüseyn kimi tanınan Hüseyn Əlizadə anası ilə birlikdə Rübabə Ağayevadan külli-miqdarda pul və qızılı-zinət əşyalarını fırıldaq yolu ilə ələ keçirib. Qadın şikayət ərizəsində ümumilikdə 300 min manatdan artıq pulunun dələduzluq yolu ilə ələ keçirildiyini bildirib.
Qeyd edək ki, pulları Ağayevlər ailəsindən cinlərə qonaqlıq vermək adı ilə alan H.Əlizadə və anasının cinayət işi Binəqədi rayon prokurorluğunda araşdırıldıqdan sonra Bakı Şəhər Baş Polis İdarəsinə göndərilib.
Belə ki, Lalə İbrahimova və oğlu Hüseyn Əlizadə Ağayevlər ailəsini öz torlarına salan kimi bir çox tanınmış insanları bu formada aldadıblar.
Milli Məclisin deputatlarından tutmuş iş adamlarının ailələrini, sənətçiləri aldadaraq onlardan cin çıxarmaq adı ilə küllü miqdarda pul və qızıl-zinət əşyaları ala bilblər.
Rübabə Ağayevanın dediyinə görə, o, cindar Hüseynə ümumilikdə 300 min manata yaxın pul- 57000 ABŞ dolları, 15000 Böyük Britanya funt sterlinq, 47000 manat və 55 min manat dəyərində 600 qram qızıl və zinət əşyaları verib.
Rübabə Ağayeva Binəqədi rayon prokuroru Nazim İmanova yazdığı şikayət ərizəsində bildirib ki, 2016-cı ilin dekabr ayında evində təmir işləri zamanı həyətindən dua tapılıb. O, qohumum Qızxanımdan falçı tapmağı xahiş edib. Qızxanım Əliyeva vasitəsi ilə falçı (cindar) Hüseyin Əlizadə ilə tanış olub:
“Təxminən aprel ayının əvvəllərində Qızxanım məni Hüseyn Əlizadənin yaşadığı Bakı şəhəri Axundov bağı yaxınlığında yerləşən evinə apardı. Həmin ev iki otaqlı idi. Məni otaqlardan birinə saldı. Dəhlizdə Hüseyn mənim telefonumu və digər əşyalarımı götürürdü və orada olan ayaqqabı dolabçasının üzərinə qoyurdu. Mən otağa daxil olanda üzərimdə heç nə qalmadı. O birisi otaqda isə Hüseynin arvadı olurdu. Hüseyn arvadını çağıranda Gülşən deyirdi. Onların iki azyaşlı əkiz uşaqları vardı. Mənin daxil olduğum otaqda jurnal stolunun üstündə kitablar, şamlar, kasanın içində beşbarmaq, möhürlər, təsbehlər vardı. Hüseyn Əlizadə mənim falıma baxaraq dedi ki, sizin həyətdə 3 dənə cadu basdırılıb, onları çıxarmalı və sonra təmizləməlidir, əks təqdirdə mənim evimdə faciələr baş verəcək mənim oğlanlarım ölə bilər".
Zərərçəkən bu addımını 3 oğlunun başına bir iş gələcəyindən qorxması ilə əlaqələndirib.
"Mən həmin gün Hüseynə fala baxdırandan sonra 20 manat verib çıxıb getdim. Sonradan mənimlə Hüseyn telefon vasitəsi əlaqə saxladı. Hüseynin yanında olarkən o, məndən həyətimdə olan cadunu çıxarmanın qarşılığında cəmi 600 manat, cadunu təmizləmək və təsirini azaltmaq üçün isə 2000 manat istədi. Mən evə qayıtdım və bir neçə gündən sonra Hüseyn Əlizadəni evə dəvət etdim ki, cadunu evdən çıxarsın. Bu hadisəni mən qohumum Röya Səfərovaya danışdım. 2017-ci ilin aprel ayında Hüseyn Əlizadə bizim evimizə gəldi. Həmin vaxt onunla bir qadında gəlmişdi. Sonradan bildim ki, bu Hüseynin anasıdır və adı Lalə İbrahimovadır. Onlar həyətdən iki ədəd büküm çıxardılar, bir bükümü isə yataq otağında yastığın içindən çıxardılar. Bu prosesi Röya Səfərova da gördü.
Onlar bükümləri mətbəxdə açdılar və Hüseyn dedi ki, bunlar təmizlənməlidir. Mən onlara danışdığımız kimi 2600 manat pul verdim. Bundan sonra onlar getdilər. Bir neçə gün sonra mən Hüseynə zəng etdim və cadunu təmizləyib təmizləmədiyini soruşdum. Hüseyn məni evinə çağırdı. Mən onun evinə getdim və mənə dedi ki, ərinə cadu edilib və o çıxarılmalıdır, yoxsa ərin infakt olacaq və sonra öləcək. Bu söhbət zamanı Lalə İbrahimovada orada olub".
Falçının dediklərindən qorxuya düşən Rübabə Ağayeva bir neçə gün sonra həyat yoldaşı Faiq Ağayevin Z.Tağıyev qəsəbəsində yerləşən iş yerinin yaxınlığında görüşüblər.
"Oraya biz Lalə və Hüseynin gəldikləri boz rəngli markasını bilmədiyim maşınla getmişdik. Sürücünü tanımıram. Orada yolun kənarında Hüseyn şam ağaclarının altından bir büküm və bir ədəd yod qabı götürdü. Bunun qarşılığında Hüseyn məndən 1900 manat pul istədi. O, mənə bildirdi ki, 400 AZN cadunun çıxartmaq və 1500 manat isə cadunun təsirini zəiflətmək üçün verməlisən. Növbəti gün mən Hüseynin yaşadığı həmin evə getdim və orada ona 1900 manat pul verdim. Bundan bir neçə gün sonra Hüseyn şəxsi nömrəsindən zəng edərək məni çağırdı. Mən onun yaşadığı evə getdim. Hüseyn kitab açdı və dedi ki, uşaqların xəstələnəcək və öləcək və mənə təklif etdi ki, evinə gələcəm və evində cadu çıxaracam.
Bundan başqa dedi ki, sənin evində qızılların var, onlarda ağırlıq var, onlarıda gətirərsən təmizləyərəm. Bunun üçün məndən əlavə olaraq 1000 manat pul istədi. Mən qorxuya düşdüm və onunla razılaşdım. Bundan sonra mən evdə olan qızıllarımın bir hissəsini aparıb evində Hüseynə verdim. Həmin vaxt verdiyim qızıllarım sovet və italyan istehsalı üzərində brilliant qaşlar olan sırğa üzük dəsti və bilərziklər idi. Bundan bir neçə gün sonra mən qalan qızıllarımıdan bir hissəsini aparıb Hüseynə verdim. Təxminən 2017-ci ilin may ayının əvvəllərində Hüseyn və Lalə bizim evin yaxınlığına gəldilər.
Onlar yenə həmin taksi sürücüsü ilə gəlmişdilər. Mən onları qarşılayanda taksi sürücüsünü gördüm. Onlar onu Əsgər kimi çağırırdılar. Hüseyn və Lalə evə gəldilər, Hüseyn əlində olan şprislə evə maye səpməyə başladı. Lalədə onun yanında idi. Onlar getdilər. Bir neçə gün sonra mən Hüseynin yaşadığı evə getdim və ona danışdığımız kimi 1000 manat pul verdim. Bundan bir neçə gün sonra mən Hüseynə zəng etdim və mən ondan təmizləyib təmizlədiyini soruşanda o, məni yenidən yaşadığı evə dəvət etdi. Bundan bir neçə gün sonra mən həmin evə getdim. Yenə mənim telefonum və əşyalarımı götürdü və mənim otağa keçməyimi bildirdi. Orada kitab açdı və dedi ki, gəlinin hamilədir və uşaq ölü doğula bilər.
Halbuki, əvvəllər söhbət zamanı mən ona gəlinimin hamilə olmasını və oğlan uşağı gözlədiyini demişdim. O məndən uşağın salamat qalmasını təşkil etməsi qarşılığında 3000 ABŞ dolları istədi və dedi ki, bunun üçün 7 qurban kəsməlisən. Buna görədə əlavə olraq 1000 manat pul verməlisən.
Mən evdən 3000 dollar və 1000 manat pul götürdüm və növbəti gün aparıb evində Hüseynə verdim. O mənə dedi ki, qurbanı özü tanışları vasitəsi ilə kəsdirəcək. Mən qurban kəsiləcəyi ilə bağlı gəlinim Ləmana da dedim. O da mənə dedi ki, bu nə qurban kəsməkdir ki, sən qurbanları görmürsən. Bundan sonra Hüseyn məndən oğlanlarıma edilən cadunu götürmək qarşılığında 2000 manat pul aldı. 2017-ci ilin iyul ayının sonlarında Hüseyn məni evinə çağırdı.
Mən ora getdim. Evdə mənə dedi ki, sizin həyətdə içində qızıl olan iki ədəd küp basdırılıb, onu çıxarmaq lazımdır, onun üzərində cin oturub. Bunun qarşılığında məndən 7000 ABŞ dollar pul istədi. Dedi çıxarandan sonra mənim payımı verərsən qalanı sənə qalar. Mən razılaşmadım və evə gəldim. Növbəti gün məni yenə çağırdı və dedi ki, fikirləş, mən kitab açmışam sən dediyim pulu tapacaqsan.
Mən dedim ki, mən ərimdən icazəsiz pul götürə bilmərəm. O da dedi ki, sən narahat olma mən elə edəcəm ki, ərin səndən biz yerinə qoyana qədər pul istəməyəcək. Növbəti gün mən evdən 7000 dollar pul götürdüm və aparıb evində Hüseynə verdim. Bundan bir neçə gün sonra Hüseyn mənə zəng etdi və dedi ki, küpün biri də artıb, pul azlıq edir, əlavə 8000 ABŞ dollar pul verməlisən. Mən dedim ki, mən gələ bilmərəm siz gəlin. Onlar evin yaxınlığında olan Bakı şəhəri Binəqədi rayonu 6-cı mikrarayonda yerləşən “Araz”adlanan marketin yanına gəldilər. Oraya Hüseyn anası Lalə ilə həmin taksi sürücüsü ilə gəlmişdi.
Həmin yerdə olan məşq qurğularının yanında mən 8000 dollar pulu Hüseynə verdim. Anası bizdən bir az aralıda oturmuşdu. O mənə bildirdi ki, bu barədə heç kimə heç nə demə. Hüseyn pulu alanda anasına dedi ki, mənim üçün küp çıxaracaq. Lalə dedi ki, bu çox çətin olacaq. Mən onlara dedim ki, tez edin, mən pulu yerinə qoymalıyam. Bundan bir neçə gün sonra Hüseyn məni yenə evinə çağırdı və dedi ki, heç kimin cadusu ilə məşğul olmayacaq, yalnız mənim işimlə məşğul olacaq.
O dedi ki, İraqa ziyarətə gedəcək və küpü çıxarmaq üçün küp suyu və ceyran göbəyi də alacaq. Ona görə də əlavə olaraq 11000 dollar pul istədi. Mən evə gəldim və ona 11000 dollar pul apardım və verdim. Həmin vaxt anası Lalə İbrahimova onun yanında idi. Təxminən 20-25 gün Hüseyndən xəbər olmadı.
Bir və ya iki dəfə mənə gizli nömrədən zəng etdi və dedi ki, İranda düzəlmədi xatalı olmasına baxmayaraq İraqa gedəcək. Mən həmin vaxtlar Lalə İbrahimova ilə telefonla əlaqə saxlayırdım. Lalə deyirdi ki, İraqa gedib arxayın ol gələcək. 2017-ci ilin avqust ayının sonlarında Lalə mənə zəng etdi və dedi ki, Hüseyni sərhəddə qarşılamağa gedir, ona 3000 dollar pul verim. Lalə evin yaxınlığında olan “Araz” adlanan marketin yanına həmin taksi sürücüsü ilə gəldi.
Məşq qurğularının yanında mən ona 3000 dollar pul verdim. O oğlunu qarşılamağa getdi. Bir həftədən sonra Hüseyn mənə zəng etdi və dedi ki, Biləsuvardadı, ehsanı var, verib Bakıya gələcək. 2017-ci ilin avqust ayının sonunda Hüseyn mənə zəng etdi və dedi ki, sənin həyətində dördüncü küp var, onu çıxarmaq üçün əlavə küp suyu almalıdır. Buna görə 10000 dollar pul istədi. Hüseyn və Lalə mənim evimin yaxınlığına Araz marketin yanına gəldilər və mən onlara 10000 ABŞ dolları pul verdim.
2017-ci ilin avqust ayının sonlarında Hüseyn mənə evində qaşlı bir şey gördüyünü və onun nə olduğunu dedi. Mənə dedi ki, onuda gətir. Məndə briliant qaşlı komplektimi ona verdim. Bundan sonra Hüseyn mənə Goradil qəsəbəsində yerləşən bağ evimdə cinlər olduğunu dedi və onları oradan çıxarmaq üçün mənim evimin yaxınlığındakı "Araz" marketin yanında məndən 4000 manat pul aldı. Həmin vaxtlar Hüseyn məni evə çağırdı və dedi ki, cinlər səni tanıyır, sən kağız yaz ki, kimdənsə qızılları götürəcək və küp olan yerə tökəcək. Bundan sonra məni divana uzatdı və sinəmin üzərinə daş qoydu və mənə bir stəkanda sarımtıl su içirdi. Göbəyimin üzərinə ayı dırnağı qoydu və təxminən yarım saat mən uzanılı vəziyyətdə qaldım.
Həmin vaxt Lalə oraya gəldi və mənim göbəyimin altından ərəbcə yazı yazdı. Bundan sonra Lalə mənim başımın üstündə dayandı və mənə kağız yazdırmağa başladı. Mən səhv yazdığımdan bir neçə dəfə kağızı dəyişdirdilər. Mən, Lalə nə deyirdisə onu yazırdım.
Yazdığımın mahiyyətini bilmirdim. Həmin vaxt heç bir çəkiliş olmadı. 1 sentyabr 2017-ci ildə nəvəm kifayət qədər sağlam dünyaya gəldi. Həmin gecə mən Hüseynə zəng etdim. Bu vaxt onun nömrəsinə zəng çatmadığından arvadı Gülşənin nömrəsini yığdım. Hüseyn telefonu özü açdı və mən ona uşağın dünyaya gəldiyini və salamat olduğunu dedim. Bu dövr ərzində Hüseyn və Lalə məndən 42000 dollar və 7500 manat pul almışdır. Bundan sonra sentyabr ayının ortalarında Hüseyn məni evə çağırdı, həmin vaxt o evini dəyişib üzbəüz binada olan evə köçmüşdü. Həmişəki kimi telefonum və əşyalarımı məndən aldı və məni həmin otağa apardı. Orada məni divana uzatdı və sinəmin üzərinə daş qoydu və mənə bir stəkanda sarımtıl su içirdi.
Göbəyimin üzərinə ayı dırnağı qoydu və təxminən yarım saat mən uzanılı vəziyyətdə qaldım. Həmin vaxt işıqları söndürmüşdü. Mənə dedi ki, indi küpün hansı dərinlikdə olmasını biləcək. Sonra şamları gətirib jurnal stolunun üzərinə düzdü. Sonra rahib paltarı kimi bir paltar geyinib yanan şamların ətrafında fırlanmağa başladı. Sonra mənə dedi ki, bir rəqəm de, mən 3 deyəndə mənə dedi ki, yox 7-dir. Küplər 7 metr dərinlikdədir.
Bundan sonra mənə hər metr üçün 1000 dollar pul istədi. Həmin gün mən evə qayıtdım və mən ona həmin yerdə 7000 dollar pul verdim. Bundan sonra Hüseyn cinlərə qonaqlıq verəcəyini bildirdi, buna görə məndən iki dəfə hər dəfə 1000 dollar və bir dəfə 3000 dollar pul aldı. Həmin dövrdə Hüseyn və Lalə mənə dedilər ki, küpün olduğu yerə tökmək üçün qızıl alacaqlar, buna görə 4000 manat pul istədilər. Məndə onlara 4000 manat pul verdim. Bundan sonra onlar məndən küpün olduğu yerə tökmək üçün qızıl alacaqları adı altında 3 dəfəyə 15000 funt sterlinq və hissə-hissə 13500 manat pul aldılar.
Mən Hüseynə pulum olmadığını və evdə xarici valyuta qaldığını deyəndə o, gətirməyimi bildirdi. 2017-ci ilin sentyabr ayının sonlarında Hüseyn məndən cin tükü alması üçün 10000 dollar pul istədi. Məndə dollar az qaldığından olmadığından ona dollar ekvivalentində 17000 manat pul verdim. Həmin vaxt Hüseyn və Lalə mənə bildirdilər ki, Tovuz rayonunda küp çıxarıb. Onların evinə getdim. Orada Lalə və Hüseyn küp gətirdilər və stolun üzərinə qoydular. Mən ona dedim ki, küp torpaqdan çıxıbsa palçıqlı olmalıdır. Hüseyn dedi ki, Lalə onu dəfələrlə yuyub. Bundan sonra qızılları stolun üzərinə tökdü. Mən qızıllara tərəf baxmadım, sadəcə onu dedim ki, məndən götürdüyün qızılları və pulları geri ver yerinə qoyum. Bu proses həmin otaqda gedirdi. Qızılları ayırdı və mənə dedi ki, sən bu qızılları cinlərdən təhvil almalısan, yoxsa cinlər onu dəmirə və ya misə cevirə bilər. Həmin vaxt Lalə və Hüseyn mənə sarımtıl rəngdə bulanıq su verdilər və mənə nəsə oxudular. Mənə Lalənin adına kağız yazdırdılar. Hüseyn dedi iki nəfər olmalıdır, onda Lalə Cəfər adı dedi. Mən dedim ki, Cəfər kimdir. Lalə dedi ki, elə belə dedim.
Bundan sonra mənə Lalə və Hüseyn mənə nə yazacağımı diktə etməyə başladılar. Məndə onların dediyini yazmağa başladım. Yazdığımın mahiyyətini başa düşmürdüm, sadəcə onların dediyini yazdım. Yazını mənə bir neçə dəfə yazdırdı. Həmin vaxt gördüm ki, Lalə əlində olan telefonun kamerasını mənə tərəf tutub. Mən Laləyə məni çəkirsənmi deyəndə o dedi ki, qızılları cəkirəm, şəkillərini satacağımız adama göndərəcəyik.
Mən ondan təkrarən soruşanda o mənə səni çəkmirəm dedi. 2017-ci ilin sentyabr ayının sonlarında Bakı şəhəri Binəqədi rayonu 6-cı mikrarayonda yerləşən "Araz" marketin yaxınlığında mən Hüseynə sonuncu dəfə 3000 ABŞ dolları pul vermişəm. Ümumilikdə Hüseyn və Lalə məni aldadaraq və etibarımdan sui-istifadə edərək dələduzluq yolu ilə məndə 57000 ABŞ dolları, 15000 Böyük Britanya funt sterlinq, 47000 manat və 600 qram qızıl və zinət əşyalarımı almış və mənə təxmninən 300.000 manata yaxın maddi ziyan vurmuşlar".
Hüseyn və Lalə tərəfindən dələduzluq yolu ilə ələ keçirilmiş qızıl zinət əşyaları aşağdakılardır:
2.5 karat brilliant qaşı olan qızıl kale boyunbağı dəsti- 40 qram;
Qızıl kale boyunbağı dəsti -45 qram;
Qızıl kale boyunbağı dəsti -55 qram;
Ağ qızıldan brilliant qaşlı paxlava üzük- 9 qram;
Qızıl bilərzik (italyan qızılı) -15 qram;
Qızıl boyunbağı (tros), qızıl bilərzik (tros)-100 qram;
Qırmızı və brilliat qaşlı üzük-sırğa dəsti- 18 qram,
Halqa qızıl bilərzik 3 ədəd -10 qram;
Mirvari və brilliant qaşlı sırğa, üzük, bilərzik dəsti- 12 qram;
Kale brilliant qaşlı qızıl üzük, boyunbağı və sırğa dəsti- 45qram;
Kale brilliant qaşlı qızıl boyunbağı dəsti- 55 qram;
“Fantaziya” üzük və sırğa dəsti- 20 qram;
5 brilliant qaşlı qızıl üzük -9 qram;
Qızıl 2 karat brilliant və yaşıl qaşlı sırğa, üzük dəsti-25 qram;
Brilliant qaşlı qızıl kloun -25 qram;
3 ədəd qızıl üzük- 15n qram ;
Qızıl klounlu boyunbağı -15 qram;
Brilliant qaşlı kale qızıl boyunbağı dəsti-55 qram;
3 ədəd brilliant qaşlı üzük- 15 qram.
Qeyd edək ki, ümumilikdə hələlik 6 nəfər şikayət ərizəsi ilə hüquq-mühafizə orqanlarına müraciət edib. Onlar da Hüseyn və Lalədən şikayətçidilər.
Şahidi olduğunuz hadisələri çəkib bizə göndərin!
Son Əlavə