Rusiyanın ən böyük özəl neft şirkəti sayılan "Lukoyl"un həmsahibi və vitse-prezidenti Leonid Fedun neftin bir barelinin 25 dollardan aşağı düşməsini fəlakət adlandırıb.
"Azadlıq" radiosunun Rusiya bölməsinin (Radio Svoboda) məlumatına görə, o, qiymətlərin enməsinə səbəb olaraq bu ilin mart ayının 6-da Səudiyyə Ərəbistanı və Rusiya arasında neft hasilatının həcmi barədə razılığa gəlinə bilinməməsini, səudiyyəlilərin neft bazarındakı paylarını 25% artırmasını göstərib.
"İndi də iqtisadiyyata koronavirus bəlası gəlib. Bizim hesablarımıza görə, neft sahəsinə vurulan şok sayəsində qiymət 20-25 dollar arasında dəyişəcək. Əgər tərəflər anlaşa bilsəydilər, bu gün neftin bir bareli 50 dollar civarında dəyərləndiriləcəkdi", - deyə Leonid Fedin qeyd edib.
Onun sözlərinə görə, yerli neft maqnatlarının prezident Vladimir Putinlə OPEC+ zirvəsindən bir gün öncəki görüşü zamanı qətiyyən Rusiyanın sazişdən çıxacağı müzakirə olunmayıb: "Hərçənd mən ayrı-ayrı dövlət şirkətlərinin bu məsələnin Kremldə aktiv şəkildə lobbiçiliyini apardıqlarını bilirdim. Lakin onlar da ən dəhşətli yuxularında belə, nefti 25 dollardan aşağı qiymətə sata biləcəklərini görməyiblər".
Leonid Fedun Rusiyanın Səudiyyə Ərəbistanı ilə anlaşmadan çıxması fikrinin dövlətə məxsus "Rosneft" şirkəti tərəfindən müdafiə olunduğunu bildirib. Rusiyalı milyarder rəsmi Ər-Riyadla neft bazarında aparılacaq savaşda yeganə qalibin ABŞ olacağını vurğulayıb.
"Lukoyl" ekspertlərinin hesablamalarına görə, neftin qiymətlərinin aşağı düşməsi ABŞ əhalisinin gəlirini 6% artıracaq. Rusiya isə məlum "özünəməxsus" vergi sistemindən dolayı ölkə daxilində benzinin qiymətlərini endirə bilmir.
Şahidi olduğunuz hadisələri çəkib bizə göndərin!
Son Əlavə