Azərbaycanı istəməyən qüvvələr tərəfindən belə fikirlər səsləndirilir ki, futbol üzrə Avropa Liqasının final oyununun Bakıda keçirilməsi mümkün deyil. Guya oyunçuları, yarışı izləməyə gələnləri təhlükə gözləyə bilər, Azərbaycan stabil ölkə deyil və bu baxımdan, onlar Bakıya gələ bilməzlər.
Bunu oxu.az-a açıqlamasında millət vəkili Tahir Rzayev UEFA Avropa Liqasının 29 mayda Bakıda keçiriləcək final oyunu ərəfəsində Böyük Britaniya Xarici İşlər Nazirliyinin Azərbaycana aid səyahət tövsiyələrinə münasibət bildirərkən deyib
Millət vəkili birmənalı şəkildə qeyd edib ki, bütün bunlar həqiqətə uyğun deyil, Azərbaycan reallıqlarını düzgün əks etdirmir:
“Çünki bu günə kimi Bakıda, Azərbaycanda bir çox mötəbər idman yarışları keçirilib və özü də çox yüksək şəkildə təşkil olunub.
Birinci Avropa Oyunları, Dördüncü İslamiada, “Formula-1” və digər beynəlxalq səviyyəli idman yarışlarına Azərbaycan çox uğurla və layiqli şəkildə ev sahibliyi edib.
Xarici idman şərhçiləri, bu yarışlara qatılan insanlar - idmançılar, turistlər bu oyunların çox yüksək səviyyədə keçirildiyini dəfələrlə vurğulayıblar, hətta təşkilatçılıq işlərinin analoqu olmadığını belə vurğulayıblar.
Ona görə də indi belə bir fikrin səslənməsi, Böyük Britaniya Xarici İşlər Nazirliyinin tövsiyələri heç bir halda düzgün deyil və Azərbaycanın beynəlxalq imicinə zərbə vurmaq məqsədi güdür. Bu oyun, final qarşılaşması Bakıda keçiriləcək, özü də yüksək səviyyədə baş tutacaq”.
Millət vəkili Aqil Abbas da həmkarı kimi düşünür.
“Qısaca danışacağam, it hürər, karvan keçər. Bunlar həm də birinci dəfə deyil ki baş verir?! Azərbaycana qarşı belə kampaniyalar “Avroviziya-2012”də də, İslamiada da, Birinci Avropa Oyunlarında da vardı.
Ümumiyyətlə, belə qaralama kampaniyaları hər zaman olub, var, bundan sonra da olacaq. Eləsinlər, nəyi qaralayırlar, qaralasınlar. Amma final oyunu Bakıda baş tutacaq, özü də gözəl keçiriləcək.
İnşallah, mənim fikrimcə, Məsut Özilin komandası da (“Arsenal” - K.H.) qalib gələcək. Çünki orada Məsut Özil - Azərbaycan xalqının sevimlisi oynayır”, - deyə A.Abbas bildirib.
Şahidi olduğunuz hadisələri çəkib bizə göndərin!
Son Əlavə