İŞİD Suriyada məğlub olduğunu bildirib

İŞİD terror qruplaşmasının rəhbəri Əbu Bəkir əl-Bağdadi sosial şəbəkələrdə yayılmış videomüraciətində Baquz şəhəri uğrunda döyüşün başa çatdığını bildirib.

Median.Az-ın məlumatına görə, bu barədə "Report" "Reuters"ə istinadən xəbər verir.

Əbu Bəkir əl-Bağdadi həmçinin müraciətində İŞİD döyüşçülərinin öldürülməsində və onların tutulmasında iştirakı olan insanlardan qisas alacağını söz verib.

Baquz uğrunda döyüş 2019-cu ilin fevralında Suriya demokratik qüvvələrinin və Amerika koalisiyasının iştirakı ilə başlayıb. Martın 23-də Suriya hərbçiləri əməliyyatın başa çatdığını elan ediblər. Baquz İŞİD-in Suriyadakı son qalası hesab edilirdi.

Qeyd edək ki, bu, əl-Bağdadinin son 5 ildə ilk videoyazısıdır. İŞİD rəhbəri sonuncu dəfə 2014-cü ilin iyulunda tərəfdarları qarşısına çıxıb.

Daha əvvəl İŞİD terror qruplaşması Şri-Lankada törədilən partlayışlara görə məsuliyyəti üzərinə götürüb.