"Qarabağ"dan Yankoviç və Silva açıqlaması (Yenilənib)

"Qarabağ" klubu Marko Yankoviç və Mateus Silva ilə bağlı yayılan xəbərlərə aydınlıq gətirib.

Ağdam təmsilçisinin mətbuat xidmətindən bildirilib ki, hər iki futbolçunun əsas komandadan uzaqlaşdırılması barədə məlumatlar həqiqəti əks etdirmir.

Bununla belə, klub futbolçular barəsində daxili intizam qaydalarına uyğun cəza tədbirlərinin görüldüyünü təsdiqləyib.

Açıqlamada klubdaxili intizam məsələlərinin təfərrüatı barədə ictimaiyyətə əlavə məlumat verilməsinin məqsədəuyğun hesab edilmədiyi vurğulanıb.

Qeyd edək ki, hər iki futbolçu bu gün saat 18:00-da başlayan "Qarabağ" - "Turan Tovuz" oyununda ehtiyat oyunçular skamyasında yer alıb.

* * * * *

"Qarabağ"ın baş məşqçisi Qurban Qurbanov Marko Yankoviç və Mateus Silvanı əsas komandadan kənarlaşdırıb.

Median.Az Sportinfo.az-a istinadən xəbər verir ki, buna səbəb hər iki futbolçunun Misli Premyer Liqasının X turunda "Qəbələ" ilə keçirilən oyunda (0:0) yaşadığı mübahisə olub.

Belə ki, qarşılaşmanın ilk hissəsində monteneqrolu yarımmüdafiəçi ilə braziliyalı müdafiəçi arasında sözlü münaqişə yaranıb. Komanda yoldaşları tərəfləri sakitləşdiriblər. Qurban Qurbanov isə fasilədə hər iki futbolçunu əvəzləyib.

Baş məşqçi matçdan sonra keçirilən mətbuat konfransında hadisəyə münasibət bildirərək, oyunçuların mütləq cəzalandırılacağını söyləyib.

Məlumata görə, insidentin iştirakçılarından hər biri 20 min dollar məbləğində cərimələnib.