Günəşdən Yerdən təxminən 10 dəfə uzaqda yerləşən nəhəng planet Saturn oktyabrın 4-də “qarşıdurma” (oppozisiya) mərhələsinə çatıb. Bu zaman Yer Günəşlə Saturnun demək olar ki, tam arasında yerləşir. Bu səbəbdən qarşıdakı günlər Saturnu müşahidə etmək üçün ilin ən əlverişli dövrlərindən biri hesab olunur.

Qaynarinfo TRT Haber-ə istinadən xəbər verir ki, oppozisiya planetləri müşahidə etmək üçün ən uyğun mərhələdir. Bu zaman planet Günəş batarkən doğur, gecə boyu səmada görünür və Günəş doğmağa yaxın batır. Eyni zamanda Saturn il ərzində Yerə ən yaxın mövqeyinə gəlir.

Saturnu adi gözlə də görmək mümkündür. Planet səmada orta parlaqlığa malik, krem-ağ rəngli obyekt kimi görünür. Ulduzlardan fərqli olaraq onun işığı sayrışmır və sabit şəkildə parlayır. Saturnun parlaqlığı təxminən +0,3 təşkil edir.

Oktyabrın 5-də saat 21:00 radələrində şərq-cənub-şərq istiqamətində üfüqə baxdıqda Saturnu görmək mümkün olacaq. Həmin vaxt planet üfüqdən kifayət qədər yüksəlmiş olacaq və gecə irəlilədikcə daha da yuxarı qalxacaq. Saturnu tapmaq üçün Böyük Peqas Kvadratı yaxşı istiqamət göstəricisi rolunu oynayır. Planet bu ulduz qrupunun bir qədər aşağı hissəsində yerləşir.

Saturnu tapdıqdan sonra onu növbəti axşamlarda da müşahidə etmək mümkündür. Planet ətrafındakı ulduzlardan fərqli olaraq, arxa plandakı bürclərə nisbətən mövqeyini yavaş-yavaş dəyişir.

Saturnun özünü adi gözlə görmək asan olsa da, onun məşhur halqalarını müşahidə etmək üçün kiçik teleskop lazımdır. Xüsusilə Cənub yarımkürəsindən aparılan müşahidələr zamanı Saturn səmada daha yüksəkdə yerləşdiyindən planet daha əlverişli bucaq altında görünür.скачать dle 11.3