Rusiyanın İrkutsk vilayətində 189 nəfər vəba şübhəsi ilə xəstəxanaya yerləşdirilmişdi. Rusiyada vəba ilə bağlı müxtəlif məlumatların yayılması yoluxucu xəstəliklərin sərhədlərarası yayılma riskini yenidən gündəmə gətirib. Ümumdünya Səhiyyə Təşkilatının məlumatına görə, vəba əsasən çirkli su və qida vasitəsilə yayılan kəskin bağırsaq infeksiyasıdır və müalicə olunmadıqda sürətlə ağırlaşa bilər.

Bəs vəba Rusiyadan Azərbaycana və digər qonşu ölkələrə keçə bilərmi?

Vəba hansı yollarla yayılır və insandan insana keçməsi necə baş verir?
Hadisə ilə bağlı Median.Az-a açıqlama verən tibb üzrə ekspert Aydın Əliyev bildirib ki, vəba infeksion xəstəliklərə aiddir:

"Vəbanın törədicisi (lat. Vibrio cholerae) adlanır. Bu xəstəlik 1883-cü ildə R. Kox tərəfindən tapılıb. Bakteriya yüksək dərəcədə yoluxuculuğa malikdir. Əsas mənbələri isə çirkli su, yuyulmamış meyvə-tərəvəzlər, bişməmiş dəniz məhsulları xəstəliyə səbəb olurlar".

Aydın Əliyevin sözlərinə görə, xəstənin qusuntu maddələri də əsas mənbələrdən sayılır. İnsanlar birbaşa deyil, ortaq şəkildə çirkli su və qidadan istifadə etdikdə xəstəliyə yoluxa bilirlər.

Vəbanın simptomlarından bəhs edən mütəxəsis əlavə edib:

"Bu zaman ishal, ürəkbulanma, qıcıqlanma, təzyiqin aşağı düşməsi, dərinin quruması, uşaqlarda temperatur, qıcolma, yuxululuq, komaya düşmə, kalium və şəkər azlığı, böyrək çatışmazlığı ola bilir".
Sanitariya və gigiyena qaydalarından düzgün istifadə etməyə xüsusi diqqət çəkən ekspert vurğulayıb:

"Qida və su mənbələri tam şəkildə sanitar normativlərə cavab verməlidir. O cümlədən evdə də bu məsələlərə diqqət yetirmək lazımdır. Əgər şübhəli bir hal hiss olunarsa, mütləq həkimə müraciət olunmalıdır".

Aydin Əliyev sonda qeyd edib ki, vəba xəstəliyi hansı ölkədə varsa, həmin ölkədən qida məhsullarının qəbulu dayandırılmalıdır. Çünki bu xəstəlik yayılmaya səbəb ola bilir.

Dəniz Pənahova
Median.Azскачать dle 11.3