Astara rayonunda müxtəlif şəxsləri dövlət qurumlarına və təhsil müəssisələrinə işə düzəltmək, müəllimləri sertifikasiya imtahanından keçirmək və digər məsələlərdə köməklik göstərmək vədi ilə aldadaraq pullarını ələ keçirən şəxsə hökm oxunub.

Qaynarinfo-nun məlumatına görə, məhkəmə araşdırması zamanı müəyyən edilib ki, təqsirləndirilən şəxs müxtəlif vaxtlarda ayrı-ayrı şəxslərin etibarından sui-istifadə edərək onlardan külli miqdarda pul alıb. İş materiallarında sadalanan epizodlar üzrə zərərçəkmiş şəxslərə ümumilikdə 75 125 manat məbləğində maddi ziyan dəydiyi göstərilir.

O, Dövlət Gömrük Komitəsində (DGK) tanışlarının olduğunu və həmin şəxslərin vasitəsilə insanları işə düzəldə bildiyini deyərək bir şəxsdən 2 900 manat, digər şəxsdən isə 7 000 manat alıb.

Bundan başqa, Fövqəladə Hallar Nazirliyinin (FHN) Lənkəran Regional Yanğından Mühafizə Xidmətinə işə düzəltmək vədi ilə 8 100 manat aldığı müəyyən edilib.

Təqsirləndirilən şəxs müəllimləri sertifikasiya imtahanından keçirmək vədi ilə də bir neçə şəxsi aldadıb. İş materiallarına əsasən, bu məqsədlə ayrı-ayrı şəxslərdən 2 500, 3 500 və 4 500 manat məbləğində pul alıb.

Məhkəmə araşdırması zamanı onun digər şəxslərdən də müxtəlif vədlərlə pul aldığı müəyyən olunub. Belə ki, torpaq sənədlərini düzəltdirmək üçün vəkil tutacağını deyərək 1 000 manat, məktəbdə kitabxanaçı vəzifəsinə işə düzəltmək vədi ilə 4 500 və 5 000 manat, körpələr evinə təsərrüfat müdiri təyin etdirəcəyini bildirərək 2 500 manat alıb.

Həmçinin bir şəxsin həyat yoldaşının iş yerini dəyişdirərək məktəbdə direktor müavini vəzifəsinə təyin olunmasına köməklik göstərəcəyini deyərək 5 000 manat aldığı müəyyən edilib.

İş üzrə qızıl-zinət əşyaları ilə bağlı bir neçə epizod da araşdırılıb. İttihama görə, təqsirləndirilən şəxs qızıl alqı-satqısı ilə məşğul olduğunu bildirərək bir şəxsin 5 400 manat dəyərində, 61 qram çəkidə qızıl Quran qabını və 650 manat pulunu alıb. Sonradan qızıl əvəzinə mis əsaslı ərintidən hazırlanmış, qızıla bənzər əşya təqdim edib. Nəticədə zərərçəkmişə ümumilikdə 6 050 manat maddi ziyan vurulub.

Digər epizodda isə ümumi dəyəri 1 700 manat olan iki qızıl üzüyü alaraq onların əvəzinə mis əsaslı ərintidən hazırlanmış boyunbağı verib.

Bundan başqa, təqsirləndirilən şəxsin daha bir şəxsin 6 375 manat dəyərində qızıl saatını daha baha qiymətə satacağı vədi ilə aldığı və sonradan qaytarmadığı müəyyən edilib.

İş materiallarında daha bir şəxsdən məhkəmə işində köməklik göstərəcəyi və azadlığın məhdudlaşdırılması cəzasının təyin olunmasına nail olacağı vədi ilə 1 000 manat aldığı da göstərilib.

Təqsirləndirilən şəxs məhkəmədə ilkin mərhələdə bir sıra epizodlar üzrə özünü təqsirli bilməsə də, məhkəmə araşdırmasının gedişində iki epizod istisna olmaqla, digər əməllər üzrə təqsirini etiraf edib. O, zərərçəkmişlərdən birinə vurduğu ziyanı tam ödədiyini bildirib.

Məhkəmə zərərçəkmiş şəxslərin, şahidlərin ifadələrini, təqsirləndirilən şəxsin ifadəsini və digər sübutları araşdıraraq onun təqsirli olduğu qənaətinə gəlib.

Təqsirləndirilən şəxs Cinayət Məcəlləsinin 178.2.1-ci maddəsi (dələduzluğun qabaqcadan əlbir olan bir qrup şəxs tərəfindən törədilməsi), 178.2.2-ci maddəsi (dələduzluğun təkrar törədilməsi), 178.2.4-cü maddəsi (xeyli miqdarda ziyan vurmaqla dələduzluq), eləcə də 29-cu maddəsi (cinayət törətməyə cəhd) ilə təqsirli bilinib.

Məhkəmənin hökmü ilə ona 7 000 manat məbləğində cərimə cəzası təyin edilib.

Cinayət Məcəlləsinin 69.4-cü maddəsi (həbsdə və ya ev dustaqlığında saxlanılma müddətinin cəza müddətinə və ya cəzanın ölçüsünə hesablanması) tətbiq edilməklə təqsirləndirilən şəxsin 3 ay 28 gün həbsdə və ev dustaqlığında saxlanılması nəzərə alınıb.

Nəticədə onun üzərində qəti olaraq 4 500 manat məbləğində cərimə cəzası saxlanılıb.скачать dle 11.3