Android smartfonlarında istifadəçilərin bəzən ekranın yuxarı hissəsində, mobil şəbəkə, Wi-Fi və batareya göstəricilərinin yanında kiçik "n" işarəsi ilə qarşılaşdığı bildirilir.

Bu işarə telefonun NFC funksiyasının aktiv olduğunu göstərir.

NFC ("Near Field Communication") yaxın məsafədə simsiz məlumat mübadiləsinə imkan verən texnologiyadır. Funksiya əsasən təmassız ödənişlərdə istifadə olunsa da, onun imkanları bununla məhdudlaşmır.

NFC vasitəsilə uyğun Bluetooth cihazlarını daha sürətli qoşmaq, bəzi smartfonlar arasında məlumat mübadiləsi aparmaq, xüsusi NFC etiketlərindən istifadə etmək və müəyyən funksiyaları avtomatlaşdırmaq mümkündür.

Məsələn, NFC etiketi vasitəsilə telefonu müəyyən nöqtəyə yaxınlaşdırdıqda "Narahat etməyin" rejiminin avtomatik aktivləşdirilməsi mümkündür. Eyni prinsip avtomobildə müxtəlif funksiyaların işə salınması üçün də tətbiq edilə bilər.

NFC-nin daim aktiv olması, bir qayda olaraq, təhlükə yaratmır. Texnologiya yalnız çox qısa məsafədə işləyir və məlumat mübadiləsinin baş verməsi üçün cihazların bir-birinə yaxınlaşdırılması tələb olunur. Bundan əlavə, NFC çox az enerji sərf edir.

Bununla belə, istifadəçilərə təhlükəsizlik məsələlərinə diqqət yetirmək tövsiyə olunur. Naməlum NFC etiketləri zərərli və ya fişinq saytlarına yönləndirə bilər.

"N" işarəsini ekrandan götürmək istəyən istifadəçilər isə bəzi telefon modellərində "Parametrlər" → "Ekran" və ya "Status sətri" bölməsindən NFC göstəricisini deaktiv edə bilərlər. Menyunun adı smartfonun modelinə və istehsalçıya görə dəyişə bilər.
//sfera.azскачать dle 11.3