ABŞ-da inflyasiya ilə bağlı narahatlıqlar və Federal Ehtiyat Sisteminin faiz siyasətinə dair gözləntilər qlobal qızıl bazarında qiymətlərin dəyişməsinə səbəb olur. Son məlumatlara görə, spot qızılın qiyməti 0,3 faiz azalaraq 4 366 dollar səviyyəsinə düşüb. FES-in faiz qərarları isə investorların qızıl kimi gəlir gətirməyən aktivlərə münasibətinə birbaşa təsir edən əsas amillərdən biridir.

Bəs dünyada qızılın qiymətində baş verən bu dəyişiklik Azərbaycan bazarında özünü necə göstərə bilər? Qızılın ucuzlaşması ölkədə zinət əşyalarının qiymətinə təsir edə bilərmi və hazırkı qiymət səviyyəsində qızıl almaq investisiya baxımından necə qiymətləndirilir?
Mövzu ilə bağlı Median.Az-a açıqlama verən iqtisadçı Natiq Cəfərli bildirib:

"Azərbaycandakı qızıl qiymətləri dünya birjası ilə paralel hərəkət edir. Dünyada qızılın qiymətində müəyyən ucuzlaşma olduqda bu, Azərbaycan bazarına da təsirsiz ötüşmür".

İqtisadçının sözlərinə görə Azərbaycan kənarda fəaliyyət göstərən bir bazar deyil:

"Son vaxtlar qızılın qiymətində ucuzlaşma var. Son bir aya nəzər salsaq, qızıl 4.800-dən 4.700 və 4.300 dollara qədər ucuzlaşıb. Təbii ki, bu, Azərbaycan bazarına da təsir edəcək. Çox güman ki, ölkəmizdə də qızıl zinət əşyalarının qram nisbətində müəyyən qiymətlərdə ucuzlaşma ola bilər".
Dəniz Pənahova
Median.Azскачать dle 11.3