Bəzi interyer həlləri sosial şəbəkələrdə çəkilmiş fotolarda olduqca gözəl görünür, lakin real həyatda praktiki olmadıqları və ya cəlbediciliyini tez itirdikləri üzə çıxır.

Bu barədə “Business Insider” üçün yazdığı məqalədə 10 ildən artıqdır bu sahədə çalışan interyer dizayneri və televiziya art-direktoru Tika Edvards bildirib.

Müəllif populyar trendlərdən bəzilərindən imtina etməyi və ya onlardan daha ehtiyatla istifadə etməyi tövsiyə edib.

Tamamilə ağ interyer

Ağ otaqlar fotolarda olduqca təsirli görünə bilər, lakin real həyatda soyuq, steril və xarakterdən məhrum təsir bağışlaya bilər. Dizaynerin sözlərinə görə, problem xüsusilə məkanda müxtəlif faktura və materiallardan istifadə edilmədikdə özünü göstərir.

“Qar kimi ağ interyerlər fotoda xəyal kimi görünə bilər, amma əslində diş həkiminin qəbul otağı qədər qonaqpərvərdir”, – dizayner qeyd edib.

Həddindən artıq parlaq divar kağızları

Gözoxşayan divar kağızları otağa fərdilik qata bilər, lakin həddindən artıq aktiv naxış qısa müddətdə məkanı yükləyə bilər. Bundan başqa, uğursuz seçilmiş divar kağızlarından təmirdən sonra qurtulmaq çətin ola bilər.

Bu səbəbdən dizayner faktura əlavə edən, lakin vizual xaos yaratmayan daha təmkinli variantları seçməyi məsləhət görür.

Boyanmış mətbəx tezgahları

Tezgahın rənglənməsi mətbəxi yeniləməyin ucuz üsulu kimi görünə bilər. Lakin belə həll gündəlik istifadəyə yaxşı davam gətirmir. Səth tədricən cızıqlar, qopmalar və ləkələrlə örtülür, boya isə rəngini dəyişə bilər.

Müəllif vurğulayır ki, hətta qoruyucu örtüklər də belə təmirin uzunömürlülüyünə zəmanət vermir.

Süni bitkilər

Süni bitkilər evə yaşıllıq əlavə etməyin asan yolu kimi görünür. Lakin dizaynerin fikrincə, onlar çox vaxt qeyri-təbii təsir bağışlayır və yalnız toz toplayır.

Bunun əvəzinə o, qulluq tələb etməyən canlı bitkilər, o cümlədən sansiviyera və ya potos seçməyi məsləhət görür. Bu bitkilər mürəkkəb qulluq tələb etmədən məkana təbii görünüş qata bilər.

Mənasız dekor

Dizayner evi satışa hazırlayarkən tez-tez istifadə olunan eyni tip vazalar, heykəlciklər və digər xırda əşyalarla məkanı doldurmamağı da tövsiyə edir.

Onun fikrincə, xüsusi məna daşımayan əşyalar qısa müddətdə sadəcə toz yığan predmetlərə çevrilir.

“Eviniz sizi əks etdirməlidir, daşınmaz əmlak broşürasının surəti olmamalıdır”, – Edvards vurğulayıb.

Uzun xovlu xalçalar

Tüklü xalçalar rahat və komfortlu görünüşü ilə cəlbedici ola bilər. Lakin uzun xovlar tez bir zamanda toz, heyvan tükü və çirk toplayır.

Bir neçə aydan sonra örtük ilkin görünüşünü itirə və xovlar əzilə bilər. Edvards alternativ olaraq vəziyyəti yaxşı saxlamaq daha asan olan xovsuz, yastı xalçaları təklif edir.

Tünd taxta döşəmə

Tünd rəngli döşəmələr fotolarda effektli görünür, lakin onların ciddi çatışmazlığı var: üzərində toz, heyvan tükü, xırda liflər və cızıqlar daha aydın görünür.

Bu səbəbdən belə döşəməyə üstünlük verənlər daha tez-tez təmizlik aparmağa hazır olmalıdırlar.

“Bulud” üslubunda divanlar

Böyük yastıqları olan yumşaq və dərin divanlar sosial şəbəkələrdə xüsusilə populyarlaşıb. Lakin müəllif bu mebel növünün imkanlarının həddindən artıq şişirdildiyini düşünür.

Belə divanlar hər zaman kifayət qədər dəstək təmin etmir, tük doldurulmuş yastıqlar isə formasını itirə bilər. Dizayner uzunömürlü divan seçərkən yüksək elastikliyə malik köpükdən hazırlanmış yastıqlara diqqət yetirməyi məsləhət görür.

Bağ mebelləri üçün ağ yastıqlar

Terras və bağlarda ağ yastıqlar təmiz və zərif görünür, lakin bu görüntü uzun sürmür. Onlar tez çirklənir, ləkələr isə parçanın dərinliyinə nüfuz edə bilər.

Dizayner daha praktik alternativ kimi tünd boz materialları və ya çirki gizlədən gözə çarpmayan naxışları göstərir.

Həddindən artıq dekorativ yastıq

Edvardsın sözlərinə görə, çoxsaylı dekorativ yastıqlar rahatlıq yaratmaq əvəzinə tez-tez qarışıqlıq hissi yaradır və interyeri qısa müddətdə köhnəlmiş göstərir.

Dizayner otağın tərtibatını həqiqətən tamamlayan bir neçə keyfiyyətli yastıqla kifayətlənməyi məsləhət görür.
//qaynar.azскачать dle 11.3