"Cənab Prezident İlham Əliyevin Şanxay Əməkdaşlıq Təşkilatının tədbirlərində iştirak etmək üçün Qırğızıstana işgüzar səfəri bu təşkilatın Azərbaycan üçün əhəmiyyətini bir daha gündəmə gətirir".

Bunu iqtisadçı Eldəniz Əmirov deyib. O bildirib ki, ŞƏT-in miqyasına baxanda bu platformanın Azərbaycan üçün əhəmiyyəti daha aydın görünür:

"Təşkilatın 10 üzvü var. Çin, Rusiya, Hindistan, Pakistan, İran, Qazaxıstan, Qırğızıstan, Özbəkistan, Tacikistan və Belarus. Bu ölkələrdə ümumilikdə 3,4 milyarddan çox insan yaşayır. ŞƏT məkanı təxminən 36 milyon kvadratkilometr ərazini, dünya ÜDM-inin təxminən 25%-ni və beynəlxalq ticarətin 15%-dən çoxunu əhatə edir. Azərbaycan hazırda ŞƏT-də dialoq tərəfdaşı statusundadır. Amma iqtisadi əlaqələrə baxdıqda təşkilata üzv ölkələrin Azərbaycan üçün çəkisi artıq kifayət qədər böyükdür. 2025-ci ildə Azərbaycanın xarici ticarətinin 10%-i Rusiya, 9,9%-i Çin, 1,6%-i Özbəkistan, 1,4%-i Qazaxıstan, 1,3%-i İran, 0,9%-i Belarus və 0,8%-i Hindistanın payına düşüb. Təkcə bu ölkələrin payını topladıqda 25,9% alınır. Pakistan, Qırğızıstan və Tacikistanı da nəzərə alsaq, ŞƏT ölkələrinin Azərbaycanın xarici ticarətində faktiki payı bundan bir qədər də yüksəkdir.

Amma Azərbaycanın ŞƏT üçün əhəmiyyəti yalnız ticarətlə məhdudlaşmır. Azərbaycan təşkilatın əsas iqtisadi mərkəzləri olan Çin və Mərkəzi Asiyanı Xəzər dənizi üzərindən Türkiyə və Avropa ilə birləşdirən nəqliyyat marşrutunun üzərində yerləşir. Bu baxımdan, Orta Dəhlizin inkişafı Azərbaycanın ŞƏT məkanındakı iqtisadi rolunu daha da artıra bilər. Dünyanın hər 4 dollar ÜDM-indən təxminən birinin formalaşdığı, 3,4 milyarddan çox insanın yaşadığı belə böyük iqtisadi məkanla münasibətlərin genişlənməsi Azərbaycan üçün siyasi, ticarət, investisiya, tranzit və logistika baxımından böyük iqtisadi imkan deməkdir".скачать dle 11.3