Azərbaycanda benzin və dizel bahalaşır?

Azərbaycanda avtomobil yanacağına xərclənən vəsaitin həcmi açıqlanıb. 2026-cı ilin yanvar-iyul aylarında pərakəndə ticarət şəbəkəsində benzin və dizel satışından 2,3 milyard manatdan çox gəlir əldə edilib. Bu rəqəm ötən ilin eyni dövrü ilə müqayisədə 4,9 faiz çoxdur.

Yanacağa xərclərin artması gələcəkdə benzin və dizelin qiymətinə təsir göstərə bilərmi?

Median.Az bildirir ki, globalinfo.az-a danışan neft və qaz məsələləri üzrə ekspert İlham Şaban deyib ki, ilin əvvəlindən yanacağın qiymətində cüzi artım müşahidə olunub:

“Digər tərəfdən, avtomobillərin sayı hər ay artır. Ölkəyə yeni nəqliyyat vasitələri idxal edilir və onların işləməsi üçün də yanacaq lazımdır. Beləliklə, ölkə üzrə yanacağa çəkilən xərclər də artır. Bütün bu göstəricilər normal qaydada Dövlət Statistika Komitəsi tərəfindən qeydə alınır”.

İqtisadçı Eyyub Kərimli isə məsələyə belə münasibət bildirib:

“Hər bir məhsulun qiymətinə onun maya dəyərinə təsir edən amillər var. Azərbaycanda dizel və Aİ-92 markalı benzin istehsal olunur. Benzinin istehsalında istifadə olunan texnologiyalar da nəzərə alınmalıdır. Bəzi premium yanacaq məhsulları isə xarici dövlətlərdən idxal edilir. Bu məhsulların qiyməti də idxal prosesi ilə bağlıdır”.

Ekspert qeyd edib ki, müharibə səbəbindən Rusiyanın neft emalı zavodlarına ciddi ziyan dəyib:

“Bütün bunlar ölkəyə idxal olunan benzinin qiymətinə də təsir göstərə bilər. Hazırda neft məhsullarının qiymət artımına təsir edə biləcək amillər sabitdir. Qiymət artımı hələlik real görünmür. Lakin tələbat artarsa, bu, xaricdən idxalı şərtləndirə bilər və nəticədə qiymət artımına səbəb ola bilər”.