Ramzan Kadırovun böyük oğlu "Respublika Qəhrəmanı" oldu

Çeçenistan Hökumətinin sədr müavini, həmçinin fiziki tərbiyə və idman naziri Axmat Kadırova "Çeçenistan Respublikasının Qəhrəmanı" ali adı verilib.

Bu barədə məlumatı öz "Telegram” kanalında Çeçenistan Hökumətinin Baş naziri Maqomed Daudov paylaşıb.

"Əziz Çeçenistan Respublikası Hökumətinin sədr müavini – fiziki tərbiyə və idman naziri Axmat Ramzanoviç Kadırovu yüksək 'Noxçiyn Paçxlakxan qonax' (Çeçenistan Respublikasının Qəhrəmanı) adının verilməsi münasibətilə ürəkdən təbrik edirəm. Bu fəxri mükafat onun Çeçenistan Respublikası və xalqı qarşısındakı şəxsi xidmətlərinin, eləcə də fiziki tərbiyə və idmanın inkişafına verdiyi mühüm töhfənin layiqincə qiymətləndirilməsidir", - Daudov paylaşımında bildirib.

O qeyd edib ki, Axmat Kadırovun bilavasitə iştirakı ilə regionda idman infrastrukturunun təkmilləşdirilməsi, gənc istedadların dəstəklənməsi, yeni qələbələr üçün şəraitin yaradılması və sağlam həyat tərzinin populyarlaşdırılması istiqamətində geniş və sistemli işlər görülür.

"Onun peşəkarlığı, təşəbbüskarlığı və işə məsuliyyətli yanaşması sayəsində respublikada böyüyən nəslin tərbiyə edilməsinə, regionun idman potensialının gücləndirilməsinə və gələcək çempionların güclü komandasının formalaşdırılmasına yönəlmiş mühüm layihələr uğurla həyata keçirilir", – deyə Çeçenistan Hökumətinin sədri əlavə edib.