Abşeron rayonunun Masazır kəndində yerləşən yaşayış kompleksinin sakinləri elektrik enerjisinin mütəmadi olaraq kəsilməsindən şikayətçidirlər.

Ağaxan Abdullayev küçəsində yerləşən "Viktoriya" MTK-nın sakinləri problemlə bağlı Baku TV-nin qaynar xəttinə müraciət ediblər.

Sakinlərin sözlərinə görə, dörd çoxmərtəbəli binadan və 400 mənzildən ibarət yaşayış kompleksində elektrik enerjisi həftə ərzində bir neçə dəfə, bəzən isə 6-7 saat müddətinə kəsilir.

Nəticədə binalarda liftlər, su nasosları və digər zəruri sistemlər fəaliyyətini dayandırır.

"İşıq sönəndə su da olmur, çünki nasoslar işləmir. Liftlər dayanır, sakinlər, hətta uşaqlar liftdə qalırlar. İşıq olmayanda kompleksdə həyat tamamilə dayanır", - deyə şikayətçi narazılığını bildirib.

Sakinlər vurğulayıblar ki, elektrik enerjisi üçün ödənişləri vaxtında həyata keçirsələr də, MTK-nın borcu əsas gətirilərək bütün kompleksin işığı kəsilir.

MTK nümayəndəsi isə binaların hələ istismara qəbul edilmədiyini və sakinlərə fərdi abonent kodlarının bu səbəbdən verilmədiyini deyib.

"Binalar istismara verilməyib, Fövqəladə Hallar Nazirliyinin müvafiq rəyi yoxdur. Buna görə də sakinlərə əhali abonenti kimi fərdi kodların verilməsi mümkün deyil. Onlar hazırda MTK-nın qeyri-əhali abonenti üzərindən elektrik enerjisindən istifadə edirlər".
скачать dle 11.3