"Beniz"in məhkəmə istintaqı yekunlaşır

Hədə-qorxu ilə pul tələb etməkdə təqsirləndirilən "Beniz" ləqəbli bloqer Aybəniz Xəlilovanın barəsindəki cinayət işi üzrə növbəti məhkəmə iclası keçirilib.

Bakı Ağır Cinayətlər Məhkəməsində hakim Fəxri Məmmədovun sədrliyi ilə keçirilən prosesdə şahidlərin ifadələrinin dinlənilməsi mərhələsi yekunlaşdırıldıqdan sonra məhkəmə sənədlərin tədqiqinə başlayıb.

Növbəti iclas iyulun 7-nə təyin edilib.

Xatırladaq ki, tiktokerdən sevgili olduğu X.Kərimov Suraxanı Rayon Polis İdarəsinə şikayət edib. Hüquq-mühafizə orqanları tərəfindən onun barəsində Cinayət Məcəlləsinin 182.2.2 (hədə-qorxu ilə tələb etmə, təkrar törədildikdə) və 182.2.4-cü (hədə-qorxu ilə tələb etmə, xeyli miqdarda əmlak əldə etmək məqsədilə törədildikdə) maddələri ilə cinayət işi başlanıb. Şikayətçi ərizəsində Aybəniz Xəlilovanın ondan hissə-hissə olmaqla 836 min manat pul tələb etdiyini göstərib.
//oxu.az