Bakıda nənəsinin evindən xalasının pullarını oğurlayan şəxsə cəza verilib.

Median.Az "Qaynarinfo"ya istinadla xəbər verir ki, hadisə ilə bağlı 1998-ci il təvəllüdlü Ə.İ.-nin barəsində Cinayət Məcəlləsinin 177.2.3 və 177.2.4-cü maddələri ilə açılan cinayət işinə məhkəmədə baxılıb.

Məlum olub ki, 2026-cı ilin fevral ayının əvvəllərində Ə.İ. Xətai rayonunda nənəsi Əminənin evinə gedib. O, orada nənəsi ilə birgə yaşayan fiziki məhdudiyyətli xalası Güllərin 8 000 manat pulunu oğurlayıb.

O, oğurladığı vəsaitlə Xəzər rayonunun Şüvəlan qəsəbəsində gündəlik kirayə haqqı 250 manat olan həyət evi tutub, qalan pulu isə əyləncələrə xərcləyib. Məhkəmədə əməlindən peşman olduğunu bildirən Ə.İ. dəymiş ziyanı tamamilə ödədiyini və zərərçəkmiş xalası ilə barışdığını qeyd edib.

Məhkəmənin hökmü ilə Ə.İ. şübhəli şəxs qismində saxlanıldığı 2 gün çıxılmaqla, 1 il 11 ay 26 gün müddətinə azadlığın məhdudlaşdırılması cəzasına məhkum edilib. Məhkəmə onun üzərinə cəza müddətində axşam saat 23:00-dan səhər 07:00-dək yaşayış yerini tərk etməmək və elektron nəzarət vasitəsini gəzdirmək vəzifəsini qoyub.скачать dle 11.3