Pakistanda ardıcıl partlayışlar: Yeddi nəfər öldü

Pakistanın şimal-qərbindəki Xayber-Paxtunxva əyalətində partlayışlar zamanı ən azı yeddi nəfər ölüb.

Bu barədə yerli hüquq-mühafizə orqanlarına istinadla "Al Arabiya" nəşri məlumat yayıb.

İlk partlayışda məsafədən idarə edilən, kustar üsulla hazırlanmış bomba ilə fərdi pikap tipli avtomobil hədəf seçilib.

Növbəti partlayış isə yaralı şəxslər təcili tibbi yardım maşını ilə xəstəxanaya təxliyə edilərkən törədilib.

Terrora görə kimin cavabdeh olduğu hələlik aydın deyil. Lakin "Al Arabiya" nəşri vurğulayır ki, regionda "Təhrik-i-Taliban Pakistan" qruplaşması fəaliyyət göstərir.

Nəşr yazır ki, Pakistan ölkədə hücumların sayının artmasında qonşu Əfqanıstanı təqsirləndirir, rəsmi Kabil isə bu ittihamları rədd edir.