Avtomobil bazarında son dövrlərdə qiymət dəyişiklikləri və fərqli modellərə olan tələbatda dalğalanmalar müşahidə olunur. Bəzi avtomobillərin qiymətində artım qeydə alınsa da, paralel olaraq endirim kampaniyaları da bazarda yer alır. Ümumi mənzərədə isə satışların hələ tam canlanmadığı, bazarın nisbətən durğun olduğu bildirilir. Görəsən, yaz aylarında avtomobil bazarında canlanma olacaqmı? Qiymətlərdə yeni artım gözlənilirmi? Köhnə avtomobillərə tələbat necə dəyişəcək?

Mövzu ilə bağlı Median.Az-a açıqlama verən Azərbaycan Avtomobil Dilerləri Assosiasiyasının İdarə Heyətinin sədri Eyyub Əliyev bildirib ki, hər ilin əvvəlində - yanvar, fevral və mart aylarının sonuna qədər avtomobil sektorunda yeni avtomobillərin satışında durğunluq müşahidə olunur.
Onun sözlərinə görə, bunun əsas səbəblərindən biri insanların avtomobil alarkən istehsal ilinə xüsusi önəm verməsidir. Məsələn, 2026-cı ildə alıcılar 2025-ci il deyil, bu ilin istehsalı olan yeni avtomobillərə üstünlük verirlər:

“Avtomobillərin istehsalı, logistika və daşınma müddəti nəzərə alındıqda, onların ölkəyə çatdırılması təxminən iki ay yarımdan tez mümkün olmur. Bu səbəbdən də insanlar əsasən mart ayının sonlarından etibarən avtomobil almağa başlayırlar. Hazırda bazarda yalnız mövsümi durğunluq deyil, həm də müəyyən doyma müşahidə olunur. Belə ki, son illərdə ölkədə ekoloji təmiz nəqliyyat vasitələrinə tətbiq olunan güzəştlər nəticəsində çox sayda insan yeni avtomobil alıb və mövcud avtomobilini yeniləyib. Hətta əvvəllər yeni avtomobil sürməyən şəxslər də güzəştli şərtlərdən yararlanaraq yeni avtomobil sahibi olublar”.

Assosiasiya sədrinin sözlərinə görə, bu proses təkcə şəxsi avtomobillərlə məhdudlaşmayıb, taksi parkının da böyük hissəsi yenilənib. Hazırda taksi parkında əvvəlki illərdə olduğu kimi köhnə avtomobillər deyil, əsasən yeni nəqliyyat vasitələri istifadə olunur:

“Hazırda bazarda müəyyən gözləmə mövqeyi də hiss olunur. İnsanlar mövcud iqtisadi və bazar proseslərini izləyirlər. Qiymət artımı ilə bağlı fikirlər səslənsə də, rəsmi dilerlər vasitəsilə idxal olunan avtomobillərdə hələlik ciddi qiymət artımı qeydə alınmayıb. Paralel idxal yolu ilə gətirilən avtomobillərdə isə modeldən asılı olaraq həm qiymət enişləri, həm də artımlar müşahidə edilir.

E.Əliyev sonda qeyd edib ki, əvvəlki güzəştlərdən istifadə edərək fərdi şəkildə avtomobil alqı-satqısı ilə məşğul olan bir sıra şəxslər artıq bazardakı qaydaların dəyişdiyini görərək bu sahədən uzaqlaşırlar:

“Bəzi hallarda həmin şəxslər avtomobilləri dəyərindən aşağı qiymətə sataraq biznesi tərk ediblər. Bazarda baş verən qiymət dəyişiklikləri də məhz bu proseslərin nəticəsi olaraq gözlənilən idi”.скачать dle 11.3