Rusiyanın Amur vilayətində "Robinson" vertolyotu Amaranka kəndi yaxınlığındakı ağackəsmə sahəsindən qalxdıqdan sonra yoxa çıxıb.

Median.Az-ın İnterfaks.ru-ya istinadən xəbərinə görə, bu barədə Rusiya Fövqəladə Hallar Nazirliyinin regional Baş İdarəsindən açıqlama verilib.

İlkin məlumata görə, vertolyotun göyərtəsində dörd nəfər olub və hazırda onların taleyi məlum deyil.

Amur bölgəsi hökuməti isə bildirib ki, göyərtədə üç nəfər - pilot və iki sərnişin olub.

Həmçinin hüquq-mühafizə orqanlarından "İnterfaks"a verilən informasiyaya görə, helikopterdə Rusiya Daxili İşlər Nazirliyinin və İstintaq Komitəsinin əməkdaşları da olublar.

Onlar meşə ərazisinə yerüstü nəqliyyatla gəliblər, daha sonra helikopterlə geri dönürlərmiş.

Əməliyyatçılar, axtarış-xilasetmə dəstəsinin xilasediciləri və Rusiya Fövqəladə Hallar Nazirliyinin Amur vilayəti üzrə Baş İdarəsinin 42 nəfərdən və 14 texnikadan ibarət aeromobil qrupu, eləcə də üç qar maşını və bir pilotsuz uçuş aparatı (PUA) əraziyə cəlb ediliblər.

Hüquq-mühafizə orqanları vertolyotun fərdi şəxsə məxsus olduğunu və fevralın 19-da yerli vaxtla təxminən saat 23:00-da (Bakı vaxtı ilə saat 18:00-da) havaya qalxdığını qeyd ediblər. İlkin məlumata görə, uçuş üçün rəsmi icazə alınmayıb.

Hadisə ilə bağlı Rusiya Federasiyası Cinayət Məcəlləsinin 263-cü maddəsinin 3-cü hissəsi (iki və ya daha çox şəxsin ölümünə səbəb olan hava gəmilərinin hərəkəti və istismarı təhlükəsizliyi qaydalarını pozma) ilə cinayət işi açılıb.
//oxu.azскачать dle 11.3